Поўная версія
Ірына Дарафеева

У Беларусі неабходна стварыць арганізацыю па абароне ўладальнікаў аўтарскіх і сумежных правоў

Меркаванні 13.03.2018 | 09:00
Ірына Дарафеева Ірына Дарафеева Дэпутат Палаты прадстаўнікоў заслужаная артыстка Беларусі

Дэпутат Палаты прадстаўнікоў заслужаная артыстка Беларусі Ірына Дарафеева лічыць, што ў Беларусі неабходна стварыць арганізацыю па абароне ўладальнікаў аўтарскіх і сумежных правоў. Такое меркаванне карэспандэнту БЕЛТА яна выказала 12 сакавіка на мерапрыемстве, прымеркаваным да 80-годдзя Заводскага раёна Мінска.

"Што датычыцца заканатворчай дзейнасці, мяне асабліва хвалююць два законапраекты, якімі мы будзем актыўна займацца ў гэтым годзе: змяненні ў закон "Аб аўтарскім і сумежных правах" і Кодэкс аб адукацыі. Першы дакумент цяпер паступіў у Палату прадстаўнікоў і знаходзіцца ў дапрацоўцы. Мы яго актыўна абмяркоўваем, улічваем расійскі і міжнародны вопыт", - расказала Ірына Дарафеева.

Яна адзначыла, што пакуль у краіне няпроста складваецца сітуацыя з уладальнікамі сумежных правоў - выканаўцамі, вытворцамі фанаграм і гэтак далей. "Калі аўтары могуць самі адстойваць правы ў плане адлічэнняў за выкананне сваіх твораў, а таксама іх можа прадстаўляць Нацыянальны цэнтр інтэлектуальнай уласнасці, то сумежнікі не маюць такой магчымасці. Для гэтага неабходна, каб з'явілася адпаведнае акрэдытаванае таварыства па кіраванні аўтарскімі правамі. Наша задача - стварыць такое асяроддзе, у якім няхай не ў наступным годзе, але на перспектыву такое таварыства было б створана і ў разрэзе сумежных правоў закон пачаў бы працаваць", - сказала дэпутат.

Ірына Дарафеева выказала надзею, што ў гэтым годзе законапраект будзе дапрацаваны і прыняты. Разам з тым яна прызнала, што складанасцей шмат, паколькі ў галіне аўтарскага і сумежных правоў задзейнічаны прафесіяналы розных сфер і галін і трэба ўлічваць вялікую колькасць меркаванняў і нюансаў.

Ірына Дарафеева прыняла ўдзел ва ўрачыстым мерапрыемстве ў адміністрацыі Заводскага раёна Мінска па прыёме ў рады РГА "Белая Русь" ста новых актывістаў. Такім чынам дадзены старт акцыі "Белай Русі", прымеркаванай да 80-годдзя раёна.

Поўная версія