У Беларусі неабходна больш увагі ўдзяляць кадраваму планаванню ў эканоміцы і сацыяльнай сферы. Такое меркаванне выказаў 3 лістапада намеснік старшыні Палаты прадстаўнікоў Баляслаў Пірштук у ходзе выязнога пасяджэння Пастаяннай камісіі Палаты прадстаўнікоў па працы і сацыяльных пытаннях, прысвечанага стварэнню рабочых месц і забеспячэнню занятасці насельніцтва, перадае карэспандэнт БЕЛТА.
"Трэба планаваць кадры і для эканомікі, і для сацыяльнай сферы. Разам будзем думаць, як усё-такі вырашаць гэта пытанне, таму што часам мы не даём тых спецыялістаў, якія патрэбны", - заўважыў віцэ-спікер.
У сваю чаргу старшыня Пастаяннай камісіі па працы і сацыяльных пытаннях Тамара Красоўская адзначыла, што сітуацыя на беларускім рынку працы ў цэлым пачала стабілізавацца. "Але, на жаль, не ўсе рэгіёны справіліся з негатыўнымі тэндэнцыямі, і ў іх па-ранейшаму ўсё часцей змяншаецца колькасць працоўных рэсурсаў і, адпаведна, занятых у эканоміцы, таксама існуе праблема вымушанай няпоўнай занятасці на прадпрыемствах", - канстатавала дэпутат.
Паводле яе слоў, сёння ўсе намаганні дзяржавы накіраваны на стварэнне новых рабочых месц шляхам уводу новых аб'ектаў, мадэрнізацыі, пераўзбраення і больш поўнага выкарыстання дзеючых вытворчых магутнасцей, паскоранага развіцця малога бізнесу і прамысловасці, будаўніцтва, сферы паслуг і сэрвісу, нарошчвання магчымасцей і гібкіх форм працы.
