Развіццё сферы турызму дае дадатковыя магчымасці для занятасці людзей. Такое меркаванне выказаў карэспандэнту БЕЛТА старшыня Федэрацыі прафсаюзаў Беларусі Міхаіл Орда напярэдадні адкрыцця прафсаюзнай турыстычнай выстаўкі "Прафтур-2018".
"Сёння ў многіх краінах турызм забяспечвае значную долю ВУП і стварае даволі вялікую колькасць рабочых месцаў. Пры гэтым трэба разумець, што размова ідзе не толькі аб занятасці людзей у гасцінічным бізнесе, але і аб стварэнні дадатковых рабочых месцаў у гандлі, абслугоўванні, індустрыі адпачынку, нават у банкаўскай і страхавой дзейнасці. З развіццём туріндустрыі заўсёды адбываецца ажыўленне ў такіх сектарах эканомікі, як транспарт, сувязь, будаўніцтва, сельская гаспадарка", - сказаў Міхаіл Орда.
У Беларусі ў плане развіцця турыстычнай галіны вельмі вялікі патэнцыял, рэалізаваць які дапамогуць у тым ліку прынятыя рашэнні па спрашчэнні візавага рэжыму і стварэнні спрыяльных умоў для работы малых і сярэдніх прадпрыемстваў і самазанятасці людзей. Сёння практычна няма перашкод, каб, напрыклад, адкрыць кафэ або заняцца рамесніцтвам. Гэта дапаможа палепшыць інфраструктуру, неабходную для развіцця турызму, асабліва ў вёсцы і ў невялікіх гарадах, упэўнены старшыня Федэрацыі прафсаюзаў. У далейшым паспяховую работу створаных малых і сярэдніх прадпрыемстваў можа забяспечыць якраз развіццё турызму. Паколькі даход рамеснікаў, прадпрыемстваў грамадскага харчавання ў многім забяспечваюць менавіта турысты.
Федэрацыя прафсаюзаў таксама садзейнічае развіццю турыстычнага сектара ў краіне. Ужо традыцыйна ў пачатку лютага праводзіцца выстаўка "Прафтур", дзе прафсаюзны тураператар "Беларустурыст" прапануе больш за 500 цікавых варыянтаў адпачынку як для беларусаў, так і для замежных гасцей.
Напрыклад, адзін з перспектыўных напрамкаў - прамысловы турызм. Сёння ў "Беларустурыста" самы вялікі пакет прапаноў экскурсій на заводы, фабрыкі і іншыя прадпрыемствы Беларусі. Гэты напрамак сёння вельмі цікавы замежным гасцям і самім беларусам.
Запатрабаваны і аздараўленчы турызм. 13 прафсаюзных санаторыяў сёння прапануюць праграмы абсалютна на любы густ - ад традыцыйных паўнацэнных курсаў па санаторна-курортным лячэнні да тураў выхаднога дня. Напрыклад, у мінулым годзе паслугамі прафсаюзных здраўніц скарысталася больш за 85 тыс. чалавек. З іх каля 44 тыс. - гэта грамадзяне з 45 краін свету.
Прафсаюзная экскурсійна-турыстычная выстаўка "Прафтур-2018" пройдзе з 30 студзеня па 1 лютага ў Рэспубліканскім Палацы культуры прафсаюзаў.