Падыходы да падрыхтоўкі трэнерскіх кадраў неабходна змяніць. Аб гэтым заявіў 13 красавіка міністр спорту і турызму Сяргей Кавальчук, выступаючы з дакладам аб развіцці зімовых відаў спорту ў НАК Беларусі, перадае карэспандэнт БЕЛТА.
Кіраўнік спартыўнай галіны акцэнтаваў увагу на тэме падрыхтоўкі трэнерскіх кадраў. "Пасля Алімпіяды кіраўніцтва Мінспорту прысутнічала на падвядзенні вынікаў у біятлоне, фрыстайле, лыжных гонках. У гэтых відах спорту існуюць такія ж праблемы з трэнерскімі кадрамі, як і ў іншых відах. Дзяцей трэба аддаваць добрым спецыялістам, каб падрастаючае пакаленне не страціла цікавасці да заняткаў спортам. Калі не зменім падыход да выхавання кадраў, то высокіх рэзультатаў не даб'ёмся", - падкрэсліў Сяргей Кавальчук.
Карані праблем зімовых відаў можна шукаць у зніжэнні цікавасці моладзі, нізкай кваліфікацыі трэнераў, іншых момантах, але, на погляд міністра, у спорце неабходна выкараніць элементарны спажывецкі падыход - зараблянне грошай. "На праведзеныя Алімпійскія гульні ў Пхёнчхане не адабралася хакейная зборная, прадстаўнікі фігурнага катання таксама не паехалі ў Рэспубліку Карэя, а дзяржаўныя грошы на падрыхтоўку выдзяляюцца немалыя. Лічу, патрабуюць увагі арганізацыйныя моманты ў галіне. Вертыкаль кіравання спортам павінна быць зноў створана ў самыя кароткія тэрміны. Гэта работа праводзіцца ўжо, і да чэрвеня мы павінны завяршыць яе", - сказаў міністр.
Сяргей Кавальчук адзначыў, што за апошнія гады ўдалося палепшыць паказчыкі з забеспячэннем спартыўным інвентаром у рэгіёнах, але звярнуў увагу і на праблемы ў гэтым напрамку. "Часам справа не ў эканоміі грошай, а ў элементарным уліку інвентару. Пераканаўся ў гэтым на прыкладзе Віцебскай і Магілёўскай абласцей. Перад пачаткам сезона неабходна правесці семінар, каб да пачатку зімовага сезона падысці падрыхтаванымі", - падкрэсліў ён.
Прыярытэтнай задачай для ўлад у раённых цэнтрах зімой у развіцці спорту павінна стаць заліўка каткоў, стварэнне лыжных трас.
Мінспорту ўзмоцніць кантроль за правядзеннем нацыянальных чэмпіянатаў. "Напрыклад, у лыжным спорце на юніёрскім першынстве выступілі ўсяго сем юніёраў і 11 юніёрак, у біятлоне на старт у дзяўчат выйшла ўсяго адна юніёрка. Чэмпіянаты Беларусі ў такім фармаце праводзіцца не павінны", - заявіў Сяргей Кавальчук.
На думку міністра, неабходна павысіць эфектыўнасць работы спартыўных школ, правесці дэталёвы аналіз календара і планаў падрыхтоўкі па ўсіх зімовых відах.