Мясцовым Саветам трэба больш браць на сябе адказнасці па вырашэнні пытанняў людзей. Такое меркаванне выказаў 18 лютага журналістам пасля галасавання на ўчастку нумар 32 па выбарах у мясцовыя Саветы 28-га склікання ў Магілёве старшыня аблвыканкама Уладзімір Даманеўскі, перадае карэспандэнт БЕЛТА.
"Дэпутацкія паўнамоцтвы даюць дадатковыя магчымасці звяртацца ў органы выканаўчай улады, вырашаць з мясцовым насельніцтвам тыя праблемы і пытанні, якія іх хвалююць. Асабіста я зрабіў свой выбар за людзей, на каго магу разлічваць і якія нацэлены на канструктыўны дыялог, з кім будзе магчымасць вырашаць пытанні па сацыяльна-эканамічным развіцці рэгіёна", - адзначыў губернатар.
На яго думку, на любыя выбары неабходна хадзіць і абавязкова прымаць удзел, таму што гэта адна з форм праяўлення грамадзянскасці, удзел у грамадскім жыцці. "Не мае рацыю той чалавек, які нейкім чынам хоча паказаць, што ён па-за грамадствам, і яго не цікавяць тыя праблемы, што вырашаюцца ў грамадстве", - лічыць Уладзімір Даманеўскі.
Ён таксама звярнуў увагу органаў прадстаўнічай улады на неабходнасць вырашэння штодзённых, надзённых для грамадзян пытанняў, з якімі людзі звяртаюцца ў вышэйстаячыя выканаўчыя органы ўлады. "Многія з такіх пытанняў можна і трэба вырашыць на месцах", - рэзюмаваў Уладзімір Даманеўскі.
