Міжнародны форум "Мінскі дыялог" адкрывае новыя гарызонты для супрацоўніцтва і кааперацыі паміж краінамі. Такое меркаванне выказала прафесар міжнароднай палітыкі, дырэктар Цэнтра глабальнай Еўропы (Вялікабрытанія) Алена Карасцялёва ў тэлеэфіры канала "Беларусь 1", паведамляе БЕЛТА.
"Магчымасць такога дыялогу, мне здаецца, дазволіць людзям перагледзець палітыку, якая на сёння існуе, і адкрые зусім новыя гарызонты для супрацоўніцтва і кааперацыі: скажам, у рамках таго ж "Усходняга партнёрства" або двухбаковых адносін з канкрэтнымі краінамі", - адзначыла Алена Карасцялёва.
На думку прафесара, каб атрымаць нейтральную пляцоўку ў фармаце "Мінскага дыялогу" вельмі важна паспрабаваць пазбавіцца ад існуючых стэрэатыпаў. "Для таго, каб дасягнуць новага дыялогу, нам неабходна вызваліцца ад стэрэатыпаў, паспрабаваць сумеснымі намаганнямі знайсці нешта новае ў плане каштоўнасных арыентацый. Я думаю, інтарэсы бяспекі, нас усіх асабліва аб'ядноўваюць", - падкрэсліла эксперт.
Яна адзначыла, што мінская пляцоўка даказала сваю эфектыўнасць. "Сама пляцоўка працуе. Мяркуйце самі, гэта ўжо трэці "Мінскі дыялог", сабраліся каля 600 дэлегатаў і ўдзельнікаў з 40 краін свету. Такія стасункі ўнікальны. Без гэтай магчымасці, без моманту дыялогу нам немагчыма прыйсці да нейкіх новых фарматаў рэалізацыі палітычных рашэнняў", - рэзюмавала Алена Карасцялёва.
