Усе мікрараёны індывідуальнай жылой забудовы павінны быць забяспечаны інфраструктурай. Аб гэтым заявіў 7 жніўня на прэс-канферэнцыі міністр архітэктуры і будаўніцтва Анатоль Чорны, перадае карэспандэнт БЕЛТА.
"Усе мікрараёны індывідуальнай жылой забудовы павінны быць з мінімальнай інфраструктурай. Ёсць нядаўняе даручэнне кіраўніка дзяржавы разгледзець пытанне з дадатковым выдзяленнем сродкаў пад гэта", - сказаў Анатоль Чорны.
Паводле яго слоў, праблем з адвядзеннем зямлі для індывідуальнага жыллёвага будаўніцтва ў абласных, раённых цэнтрах няма. Першачарговая задача заключаецца ў забеспячэнні шматдзетных сем'яў, якія хочуць пабудаваць індывідуальнае жыллё, даступнымі фінансавымі рэсурсамі. "Гэтаму паслужаць ільготныя крэдыты па ўказе нумар 240. Праблема наспела: людзі ўжо маюць зямлю, але не могуць пачаць будаўніцтва. Што датычыцца іншых катэгорый грамадзян, то рэсурсы для будаўніцтва жылля забяспечаць у тым ліку іпатэчнае крэдытаванне, сістэма будаўнічых зберажэнняў", - растлумачыў міністр.