Людзям неабходна паказваць дакладны алгарытм вырашэння хвалюючых іх праблем. Такое меркаванне 15 верасня выказаў журналістам першы намеснік кіраўніка Адміністрацыі Прэзідэнта Беларусі Максім Рыжанкоў, перадае карэспандэнт БЕЛТА.
Максім Рыжанкоў 15 верасня наведаў Воранаўскі раён. У час візіту прайшла сустрэча з жыхарамі аграгарадка Доцішкі.
"Сёння, што важна, прагучалі пытанні не местачковага плана, маўляў, толькі для сябе, наадварот, людзей хвалюе развіццё гэтай зямлі, праблемы малых гарадоў і аграгарадкоў у цэлым. Такая грамадзянская пазіцыя радуе", - адзначыў Максім Рыжанкоў. Ён падкрэсліў, што для таго, каб утрымаць людзей у вёсцы, патрэбна не толькі добрая работа з дастойным заработкам, але і вырашэнне ўсіх бытавых пытанняў. Моладзь неабходна забяспечыць не толькі жыллём, але і стварыць неабходныя ўмовы для правядзення вольнага часу, культурнага, спартыўнага, забяспечыць доступ да поўнага пакета сацыяльных паслуг, дадаў першы намеснік кіраўніка Адміністрацыі Прэзідэнта. Шэраг зваротаў грамадзян будзе разгледжаны дадаткова, а некаторыя прапановы, магчыма, атрымаюць больш шырокую рэалізацыю. Напрыклад, у Воранаве былы інтэрнат перабудавалі ў жылы дом на 50 арэндных кватэр для маладых спецыялістаў, жыхары раёна прапанавалі перанесці вопыт стварэння арэнднага жылля і на аграгарадкі. Таксама ад мясцовых грамадзян паступалі пытанні на тэму ЖКГ, агучвалася праблема не самага лепшага стану дарог.
"Шмат яшчэ трэба будзе зрабіць, але ўрад бачыць гэтыя праблемы. Калі мы і не здымем іх адразу, але пакажам людзям дакладны алгарытм вырашэння гэтых пытанняў за канкрэтны прамежак часу, то гэта ўжо будзе гарантыяй таго, што яны застануцца на гэтай зямлі", - адзначыў Максім Рыжанкоў. Ён падкрэсліў, што мясцовыя ўлады ў прыярытэтным парадку павінны вызначаць тыя рэгіёны і аграгарадкі, якія маюць патрэбу ў той ці іншай дапамозе.
На яго думку, у першую чаргу дапамагаць трэба тым, хто імкнецца развівацца і рухацца наперад. У якасці прыкладу Максім Рыжанкоў прывёў аграгарадок Доцішкі. "Тут жывуць працавітыя і беражлівыя людзі. Відаць, што ім неабыякава родная зямля, яны любяць тое месца, дзе жывуць. Усе падворкі дагледжаны, агароджы акуратныя, усё прыбрана. Такому грамадству неабходна дапамагчы. Людзі тым, што атрымаюць, будуць даражыць", - падкрэсліў ён.
У час паездкі ў Воранаўскі раён першы намеснік кіраўніка Адміністрацыі Прэзідэнта таксама наведаў шэраг важных сацыяльных і турыстычных аб'ектаў рэгіёна, азнаёміўся з работай ААТ "Воранаўская сельгастэхніка".
