Комплексны падыход да паляпшэння ўмоў бізнесу пасадзейнічае стварэнню новых рабочых месцаў. Такое меркаванне журналістам выказаў старшыня Гродзенскага аблвыканкама Уладзімір Краўцоў, перадае карэспандэнт БЕЛТА.
Уладзімір Краўцоў прыняў удзел у пасяджэнні грамадска-кансультатыўнага (экспертнага) савета па развіцці прадпрымальніцтва пры Гродзенскім аблвыканкаме.
"Сёння мы разглядаем практыку прымянення заканадаўчых актаў, прынятых у 2017 годзе па тэме развіцця прадпрымальніцтва, стварэння спрыяльнага бізнес-клімату ў краіне. Асноватворны з іх - Дэкрэт нумар 7 "Аб развіцці прадпрымальніцтва". Удасканаленне нарматыўна-прававой базы адбылося ў выніку неаднаразовых кансультацый, нарад, абмену думкамі і вопытам", - адзначыў Уладзімір Краўцоў. Ён падкрэсліў, што прыватны сектар для Гродзенскага рэгіёна - адзін з самых значных у эканоміцы. Важна, што ён развіваецца больш дынамічна за іншыя. На думку старшыні Гродзенскага аблвыканкама, прыняцце нарматыўных актыў акажа добры ўплыў на развіццё прыватнага сектара эканомікі. І комплексны падыход да зняцця розных бар'ераў, паляпшэння ўмоў вядзення бізнесу, аптымізацыі кантрольнай дзейнасці павінен прынесці сур'ёзны вынік.
"Мы чакаем большай колькасці занятых у прыватным сектары, стварэння новых рабочых месцаў, павелічэння ўкладу ў сацыяльна-эканамічнае развіццё Гродзенскай вобласці. У любой развітой дзяржаве аснова эканомікі - гэта малы і сярэдні бізнес. І мы цяпер рухаемся ў гэтым агульным трэндзе", - адзначыў Уладзімір Краўцоў. Ён падкрэсліў, што з бізнесу не здымаецца і адказнасць у якасным аказанні паслуг, вытворчасці канкурэнтаздольнага прадукту.
"Сёння прыватны сектар рэгіёна - гэта 32 тыс. зарэгістраваных юрыдычных і фізічных асоб. У гэтых арганізацыях працуюць 127 тыс. чалавек, а гэта 37 працэнтаў ад агульнай колькасці занятых у эканоміцы. Гэта вялікі паказчык", - лічыць Уладзімір Краўцоў. Ён адзначыў дастойныя вынікі прыватнага сектара ў эканамічнай дзейнасці: 19 працэнтаў ад агульнай колькасці падаткаў у рэгіёне паступае ад малога і сярэдняга бізнесу. Важкі ўклад прыватнага сектара і ў валавы рэгіянальны прадукт - 18 працэнтаў. Тавары вытворцаў рэгіёна, у тым ліку і прыватнага сектара, запатрабаваны не толькі на беларускім, але і на сусветным рынку.
Як адзначалася ў час пасяджэння савета, у рэгіёне будзе прадоўжана работа па падтрымцы бізнесу на розных узроўнях. У 2017 годзе, напрыклад, каля Br500 тыс. было выдзелена на адкрыццё сваёй справы для беспрацоўных. У 2018 годзе на падтрымку прадпрымальніцтва будзе накіравана каля Br1 млн, прыкладна Br15 млн з фонду вобласці будзе накіравана на падтрымку інавацыйных праектаў.
