Якасць падрыхтоўкі кадраў залежыць ад арганізацыі практыкі ва ўстановах адукацыі. Такое меркаванне 15 лістапада карэспандэнту БЕЛТА выказаў першы намеснік міністра адукацыі Вадзім Богуш перад сумесным пасяджэннем Рэспубліканскага савета рэктараў ВНУ і Савета дырэктараў устаноў прафесійна-тэхнічнай і сярэдняй спецыяльнай адукацыі.
"Наколькі эфектыўна ва ўстановах адукацыі будзе арганізавана практыка - асноўны механізм фарміравання ў навучэнцаў практычных прафесійных кампетэнцый, настолькі якасна мы павысім узровень падрыхтоўкі спецыялістаў", - адзначыў Вадзім Богуш.
Пытанне, звязанае з практыка-арыентаванай падрыхтоўкай, перш за ўсё павінна разглядацца з пункту гледжання ўзаемадзеяння з заказчыкамі кадраў. "Як зрабіць гэта больш эфектыўна, мы абмяркоўваем сёння ў фармаце сумеснага пасяджэння Рэспубліканскага савета рэктараў ВНУ і Савета дырэктараў устаноў прафесійна-тэхнічнай і сярэдняй спецыяльнай адукацыі. Мы пагаворым аб развіцці сеткавай формы ўзаемадзеяння ўстаноў адукацыі, узнімем пытанні, звязаныя з іх міжузроўневай інтэграцыяй", - праінфармаваў першы намеснік міністра.
Паводле слоў Вадзіма Богуша, на сумесным пасяджэнні будзе ўзнята пытанне аб неабходных змяненнях у нарматыўнай базе, якая вызначае арганізацыю практыкі ва ўстановах адукацыі. "Наша мэта - стварыць умовы і прадаставіць больш магчымасцей для эфектыўнага ўзаемадзеяння ўстаноў адукацыі і заказчыкаў кадраў. Вынікам гэтага павінна стаць павышэнне якасці падрыхтоўкі спецыялістаў як на ўзроўні вышэйшай, так і на ўзроўні сярэдняй спецыяльнай і прафесійна-тэхнічнай адукацыі", - заключыў ён.
Сёння на базе Каледжа сучасных тэхналогій у машынабудаванні і аўтасэрвісе праходзіла сумеснае пасяджэнне Рэспубліканскага савета рэктараў ВНУ і Савета дырэктараў устаноў прафесійна-тэхнічнай і сярэдняй спецыяльнай адукацыі. Асноўнай тэмай мерапрыемства стала развіццё практыка-арыентаванага навучання ва ўстановах адукацыі рознага ўзроўню, арганізацыя практыкі і павышэнне эфектыўнасці ўзаемадзеяння з заказчыкамі кадраў. У парадку дня таксама пытанні стратэгічнага партнёрства бізнесу і адукацыі ў развіцці кадравага патэнцыялу інавацыйнай эканомікі, сеткавае ўзаемадзеянне ўстаноў адукацыі, а таксама тэндэнцыі абнаўлення зместу адукацыйных праграм у адпаведнасці са стандартамі WorldSkills.