Ініцыятыва аб прадаўжэнні кантрактаў з добрасумленнымі работнікамі садзейнічае павышэнню эфектыўнасці дзейнасці прадпрыемстваў. Такое меркаванне выказаў старшыня Федэрацыі прафсаюзаў Беларусі Міхаіл Орда ў час анлайн-канферэнцыі на сайце БЕЛТА.
Федэрацыя прапануе заканадаўча замацаваць норму аб прадаўжэнні або перазаключэнні кантрактаў з добрасумленнымі работнікамі. Такая норма ўключана ў якасці рэкамендацыйнай у Генеральнае пагадненне. Таксама яна перанесена ў шэраг галіновых пагадненняў і многія калектыўныя дагаворы. У гэтых выпадках наймальнік абавязаны прадаўжаць працоўныя адносіны з добрасумленнымі работнікамі. "Але для таго, каб гэта норма прымянялася ўсюды, каб выключыць суб'ектывізм пры прыняцці рашэнняў аб прадаўжэнні працоўных адносін з работнікамі, лічым неабходным замацаваць яе ў Працоўным кодэксе", - сказаў Міхаіл Орда.
У сённяшніх умовах, калі прыняты комплексныя рашэнні па развіцці і спрашчэнні вядзення прыватнага бізнесу, гэтыя пытанні вельмі актуальныя, упэўнены старшыня ФПБ. На рынак выходзіць вялікая колькасць новых кампаній, наймальнікаў. Далёка не ва ўсіх ёсць разуменне і вопыт вядзення сацыяльна адказнага бізнесу, неабходны ўзровень культуры вядзення бізнесу. Паводле слоў Міхаіла Орды, у гэтых умовах вельмі важна ўстанавіць такія правілы і нормы на рынку працы, якія гарантавалі б абарону інтарэсаў чалавека. Не павінна быць суб'ектывізму, становішча работніка не павінна залежаць ад добрай волі наймальніка.
"Мы павінны стымуляваць і заахвочваць добрасумленных работнікаў, у тым ліку праз прадастаўленне ім гарантый занятасці. Гэта ў сваю чаргу будзе садзейнічаць і развіццю прадпрыемстваў. Таму што калі чалавек не ўпэўнены ў сваім заўтрашнім дні, не ўпэўнены, будзе ён тут працаваць ці не, у яго і стымулу добра працаваць няма. І працуе ён спусціўшы рукавы, - адзначыў старшыня федэрацыі. - Калі ён будзе ведаць, што ад якасці яго працы, добрасумленнасці залежыць прадаўжэнне працоўных адносін, калі будзе бачыць перспектыву на заўтра, то і працаваць на вытворчасці будзе на ўсе 100 працэнтаў".