Гарманізацыя адукацыйных стандартаў мае асаблівае значэнне для Саюзнай дзяржавы, заявіў журналістам дзяржаўны сакратар Саюзнай дзяржавы Рыгор Рапота перад сумесным пасяджэннем калегій Міністэрства адукацыі, Дзяржаўнага камітэта па навуцы і тэхналогіях Беларусі і Міністэрства адукацыі і навукі Расіі, перадае карэспандэнт БЕЛТА.
"Гэта пасяджэнне калегіі доўгачаканае, назбіралася даволі шмат пытанняў, у прыватнасці, па ўдасканаленні і гарманізацыі навучальных працэсаў, адукацыйных стандартаў. Будзе таксама абмяркоўвацца пытанне заснавання прэміі Саюзнай дзяржавы ў галіне навукі і тэхнікі. Аб гэтым мы ўжо неаднаразова гаварылі. Упэўнены, што гэта пытанне будзе вырашана, ідзе адпрацоўка тэхнічных крокаў", - сказаў Рыгор Рапота.
Таксама важнымі тэмамі для абмеркавання стануць стварэнне адзінай навукова-тэхналагічнай прасторы Саюзнай дзяржавы, удасканаленне дзейнасці Беларуска-расійскага ўніверсітэта ў Магілёве, пытанні маладзёжнай палітыкі. "Напэўна, мы будзем пашыраць тэматыку алімпіяд, якія ў нас праходзяць рэгулярна", - адзначыў дзяржсакратар.
Ён падкрэсліў, што адукацыйная і навукова-тэхнічная сферы адыгрываюць асаблівую ролю ў інтэграцыйным працэсе Саюзнай дзяржавы.