Для ўстойлівага развіцця будаўнічага комплексу ёсць усе перадумовы. Такое меркаванне выказаў старшыня Федэрацыі прафсаюзаў Беларусі Міхаіл Орда на сустрэчы з работнікамі ААТ "Будтрэст нумар 8" у Брэсце, паведамілі БЕЛТА ў прэс-службе ФПБ.
На сустрэчы ўзнімаліся некаторыя праблемныя пытанні ў будаўнічай сферы. Кіраўнік нацыянальнага прафцэнтра падкрэсліў, што, нягледзячы на адмоўныя паказчыкі работы ў мінулым годзе, у будаўнікоў ёсць перспектывы і магчымасці для змянення сітуацыі. "Паляпшэнне макраэканамічнай сітуацыі ў краіне, умоў крэдытавання на рынку, зніжэнне адміністрацыйных патрабаванняў пры арганізацыі работ даюць пэўныя магчымасці для якаснага росту будаўнічага комплексу ў цэлым і дабрабыту работнікаў у прыватнасці", - сказаў Міхаіл Орда.
Старшыня ФПБ звярнуў увагу і на такія праблемныя пытанні, як парушэнне тэрмінаў выплаты заработнай платы, узровень аплаты працы ў галіне, адток прафесійных кадраў, вялікая крэдытная нагрузка і наяўнасць дэбіторскай запазычанасці перад будаўнічымі арганізацыямі з боку мясцовых бюджэтаў. "Мы бачым, што бываюць сітуацыі, калі ў тым або іншым рэгіёне пачынаецца будаўніцтва аб'ектаў без наяўнасці неабходнага фінансавання. У выніку вымываюцца абаротныя сродкі будаўнічых арганізацый, тыя вымушаны браць крэдыты пад вялікія працэнты. У выніку праблемы нарастаюць як снежны камяк. Гэта пытанне ўжо да планавання і арганізацыі работы на месцах. Мы са свайго боку звяртаемся да ўрада, да мясцовых органаў улады, гаворачы пра неабходнасць поўных разлікаў з будаўнічымі арганізацыямі", - сказаў Міхаіл Орда.
У размове з працоўным калектывам старшыня ФПБ указаў на неабходнасць пастаяннага павышэння кваліфікацыі, таму што ад гэтага залежыць прафесіяналізм работнікаў. "Ва ўмовах адкрытай эканомікі канкурэнцыя на рынку паслуг узрастае ў разы, - падкрэсліў Міхаіл Орда. - У гэтай сітуацыі неабходна шукаць новыя падыходы, укараняць сучасныя тэхналогіі, будаваць танней і хутчэй. А для таго, каб мы маглі прапанаваць добрую якасць работ, большую прадукцыйнасць працы, трэба пастаянна павышаць сваю кваліфікацыю".
У гэтай сітуацыі вельмі патрэбны механізмы, якія стымулявалі б і наймальнікаў, і саміх работнікаў да арганізацыі пастаяннага навучання і павышэння кваліфікацыі, падкрэсліў старшыня ФПБ. У сувязі з гэтым прафсаюзы ў перагаворах з сацыяльнымі партнёрамі настойваюць на ўнясенні ў калектыўныя дагаворы палажэнняў аб выдзяленні сродкаў на падрыхтоўку і перападрыхтоўку работнікаў.
