Для далейшага развіцця інтэграцыі ўнутры ЕАЭС трэба даць больш паўнамоцтваў наднацыянальным органам, перш за ўсё Еўразійскай эканамічнай камісіі. Такое меркаванне выказаў 31 кастрычніка на брыфінгу ХІІ Міжнароднай канферэнцыі "Еўразійскае развіццё" старшыня праўлення Еўразійскага банка развіцця (ЕАБР) Дзмітрый Панкін, перадае карэспандэнт БЕЛТА.
"Ключавое пытанне - гэта паўнамоцтвы наднацыянальных інстытутаў. Цяпер Еўразійская камісія не мае дастатковых паўнамоцтваў для імплементацыі ўсіх норм. Каб такія паўнамоцтвы атрымаць, трэба забраць іх у нацыянальных урадаў. Але ці гатовы нашы краіны да гэтага? У гэтым я бачу пэўную перазагрузку: калі мы хочам руху наперад і сур'ёзна глядзім на наш інтэграцыйны праект, то трэба думаць аб перадачы большых паўнамоцтваў ЕЭК, перагледзець яе функцыі", - адзначыў Дзмітрый Панкін.
Падрабязна на прычыны, па якіх неабходна прадаставіць больш паўнамоцтваў Еўразійскай эканамічнай камісіі, звярнуў увагу старшыня калегіі ЕЭК Тыгран Саркісян. "Мы стварылі наднацыянальны орган, таму што ідзём па шляху глабальнай інтэграцыі. Гэты орган павінен адлюстроўваць інтарэсы ўсіх краін-удзельніц і мае права ўстанаўліваць адзіныя для ўсіх тарыфы. Гэта азначае, што тэхнічныя рэгламенты таксама павінны быць адзінымі, фітасанітарныя патрабаванні, ветэрынарны кантроль, каранцінныя мерапрыемствы - усё павінна быць агульным. Мы ствараем усё гэта, хоць і не вельмі хуткімі тэмпамі", - растлумачыў Тыгран Саркісян.
Еўразійскі банк развіцця з'яўляецца міжнароднай фінансавай арганізацыяй, заснаванай Расіяй і Казахстанам у студзені 2006 года з мэтай садзейнічання развіццю рыначнай эканомікі дзяржаў-удзельніц, іх устойліваму эканамічнаму росту і пашырэнню ўзаемных гандлёва-эканамічных сувязей. Дзяржавамі - удзельніцамі банка з'яўляюцца Арменія, Беларусь, Казахстан, Кыргызстан, Расійская Федэрацыя і Таджыкістан.
З 2008 года банк арганізуе штогадовую міжнародную канферэнцыю "Еўразійская інтэграцыя", якая зарэкамендавала сябе як эфектыўная пляцоўка для абмену інфармацыяй і меркаваннямі прадстаўнікоў фінансавых інстытутаў, органаў улады, суб'ектаў эканамічнай дзейнасці. Дыскусійны характар канферэнцыі і рэкамендацыі, што выпрацоўваюцца ў ходзе абмеркаванняў, садзейнічаюць фарміраванню новых падыходаў да інвестыцыйнай палітыкі банка і падрыхтоўкі канструктыўных прапаноў па развіцці ЕАЭС.
