Беларуска-эстонскі дыялог уносіць уклад ва ўмацаванне супрацоўніцтва ў рэгіёне. Такое меркаванне выказаў намеснік міністра замежных спраў Беларусі Андрэй Дапкюнас 28 лютага на ўрачыстым мерапрыемстве ў Мінску з нагоды 100-годдзя незалежнасці Эстонскай Рэспублікі, перадае карэспандэнт БЕЛТА.
Намеснік міністра акцэнтаваў увагу на тым, што гэта гістарычная падзея, якая адбылася на зломе эпох, мела велікае значэнне як для Эстоніі, так і для яе суседзяў у рэгіёне. З тых часоў Эстонія прайшла вялікі шлях і дасягнула вялізных поспехаў як еўрапейская незалежная дзяржава, падкрэсліў Андрэй Дапкюнас.
Беларуска-эстонскае супрацоўніцтва заснавана на даўніх адносінах паміж краінамі. "Мы нязменна разглядаем Эстонію як важнага партнёра ў Балтыйскім рэгіёне і Еўропе ў цэлым", - заявіў намеснік міністра. Ён звярнуў увагу, што старшынства Эстоніі ў Савеце ЕС у мінулым годзе было адзначана многімі важнымі мерапрыемствамі.
Што датычыцца беларуска-эстонскіх сувязей, то назіраецца паступовае нарошчванне ўзаемнага гандлю. Андрэй Дапкюнас выказаў упэўненасць, што бакі знойдуць новыя паспяховыя напрамкі далейшага ўзаемадзеяння.
У сваю чаргу Надзвычайны і Паўнамоцны Пасол Эстоніі ў Беларусі Мэрыке Какаеў расказала, што эстонская незалежнасць пачала адлік 24 лютага 1918 года. "У гісторыі краіны былі розныя перыяды, у тым ліку такія, калі мы не маглі самастойна прымаць рашэнні, - прадоўжыла Мэрыке Какаеў. - Цяпер наша дзяржаўнасць надзейна ўмацавалася, і адзначаюцца вялікія поспехі ў развіцці краіны па многіх напрамках".
Нядаўняе старшынства Эстоніі ў Савеце ЕС дало магчымасць прадэманстраваць на міжнародным узроўні дасягненні краіны ў розных сферах, у тым ліку ў навуцы, культуры, спорце.
Пры гэтым кіраўнік дыпмісіі выказала меркаванне, што самым важным застаецца духоўнае багацце народа, і менавіта аб гэтым трэба пастаянна клапаціцца. Дабрабыт людзей, здароўе нацыі - гэта важней за многія хуткія змяненні ў грамадстве, адзначыла яна. Пасол Эстоніі ў Беларусі выказала ўпэўненасць у далейшым паспяховым развіцці сваёй дзяржавы.
