Арганізацыя Дагавора аб калектыўнай бяспецы пасылае свету сігнал аб нацэленасці на стварэнне пояса добрасуседства. Такое меркаванне ў інтэрв'ю журналістам выказаў дзяржаўны сакратар Савета бяспекі Беларусі Станіслаў Зась па выніках праведзенага ў Астане саміту АДКБ, перадае карэспандэнт БЕЛТА.
Гэту заяву дзяржсакратар Савета бяспекі зрабіў у сувязі з прыняццем кіраўнікамі дзяржаў рашэння аб прававым афармленні на ўзроўні арганізацыі статусаў наглядальніка і партнёра, што ў свой час ініцыіравала Беларусь. "Тым самым мы даём пасыл усяму свету, што арганізацыя нацэлена на супрацоўніцтва, стварэнне пояса добрасуседства. Думаю, што стварэнне такога прававога поля будзе садзейнічаць больш цеснаму ўзаемадзеянню з дзяржавамі АДКБ з боку іншых краін", - сказаў ён.
У якасці важнага выніку саміту Станіслаў Зась таксама адзначыў рашэнне лідараў краін аб палажэнні аб цэнтры крызіснага рэагавання АДКБ. Дакументам вызначаны арганізацыйныя і прававыя асновы дзейнасці структуры. "Гэта вельмі важна, улічваючы сённяшнюю сітуацыю, якая складваецца ў свеце, наяўнасць вялікай колькасці разнапланавых рызык і пагроз. Павінна быць магчымасць абмену інфармацыяй літаральна ў рэжыме анлайн і прыняцця адпаведных рашэнняў", - лічыць ён.
"У сённяшнім парадку дня з усіх прынятых рашэнняў гэта два найбольш значныя", - падкрэсліў дзяржсакратар.
