Агонь II Еўрапейскіх гульняў запаляць у Рыме 3 мая ў музейным комплексе Ara Pacis Museum. У час мерапрыемства таксама будзе прэзентаваны сімвал акцыі - аліўкавае дрэва.
Пасля факел адправіцца на гару Манблан, дзе таксама будзе падняты сцяг Беларусі. Затым эстафета прадоўжыцца па краінах Еўропы: Аўстрыі, Славеніі, Венгрыі, Славакіі, Чэхіі і Польшчы.
Агонь Еўрапейскіх гульняў пабывае ў 55 населеных пунктах на тэрыторыі 8 краін: Італіі, Славакіі, Славеніі, Венгрыі, Аўстрыі, Чэхіі, Польшчы і Беларусі.
Свой шлях у Беларусі "Полымя міру" пачне ў Брэсце 12 мая.
Факел пранясуць больш як па 60 населеных пунктах ва ўсіх рэгіёнах краіны. Фінішуе эстафета вынясеннем полымя на цырымоніі адкрыцця II Еўрапейскіх гульняў 21 чэрвеня ў Мінску на стадыёне "Дынама".
Працягласць эстафеты агню складзе роўна 50 дзён.
Факел распрацаваны дызайнерам Дырэкцыі ІІ Еўрапейскіх гульняў Юліяй Брайчук разам са спецыялістамі завода-вытворцы - ААТ "Навагрудскі завод газавай апаратуры". Факел з нержавеючай сталі вышынёй 81 см важыць каля 1,7 кг.
Факеланосцамі ў час эстафеты выступяць 450 чалавек: спартсмены, вядомыя прадстаўнікі культуры, навукі, мастацтва, грамадскія дзеячы.
Крыніца: Дырэкцыя II Еўрапейскіх гульняў 2019 года.