7 лістапада, Мінск /Кар. БЕЛТА/. Міністэрства архітэктуры і будаўніцтва разам з Нацыянальным выставачным цэнтрам "БелЭкспа" Кіраўніцтва справамі Прэзідэнта правядзе міжнародную спецыялізаваную выстаўку Budexpo з 20 па 23 мая 2020 года, паведамілі БЕЛТА ў Міністэрстве архітэктуры і будаўніцтва.
У 2020 годзе выстаўка будзе прысвечана 100-гадоваму юбілею беларускай будаўнічай галіны. У маштабным мерапрыемстве прымуць удзел буйнейшыя айчынныя і замежныя будаўнічыя прадпрыемствы, праектныя, архітэктурныя, інжынірынгавыя, інвестыцыйна-будаўнічыя арганізацыі, а таксама прыватныя інвестары і забудоўшчыкі.
Наведвальнікаў выстаўкі пазнаёмяць з асноўнымі этапамі развіцця беларускай будаўнічай галіны і прадэманструюць яе патэнцыял. Гасцей чакае насычаная дзелавая праграма. У час мерапрыемства ў беларускай сталіцы плануецца правесці пасяджэнне Міжурадавага савета па супрацоўніцтве ў будаўнічай дзейнасці дзяржаў - удзельніц Садружнасці Незалежных Дзяржаў.
Мэта Budexpo - дэманстрацыя дасягненняў будаўнічай галіны рэспублікі, выяўленне і папулярызацыя інавацыйных распрацовак і прадукцыі айчынных прадпрыемстваў у галіне праектавання, вытворчасці тавараў і паслуг, наладжванне дзелавых кантактаў і пашырэнне рынкаў збыту, а таксама вызначэнне вектараў далейшага развіцця галіны.-0-
