23 мая, Орша /Кар. БЕЛТА/. Урад рыхтуе план першачарговых мер па развіцці Аршанскага раёна, паведаміў прэм'ер-міністр Андрэй Кабякоў сёння на выязным пасяджэнні Прэзідыума Савета Міністраў, перадае карэспандэнт БЕЛТА.
Напярэдадні пасяджэння члены ўрада выязджалі ў Аршанскі раён, вывучалі сітуацыю на прадпрыемствах, аналізавалі праблемы і ключавыя пытанні развіцця рэгіёна. "Мы дамовіліся, што выпрацуем і зацвердзім першачарговыя комплексныя мерапрыемствы па развіцці раёна. Але работа па іх будзе пачата яшчэ да зацвярджэння адпаведнага плана. На аснове напрацовак рэспубліканскіх органаў кіравання, Віцебскага аблвыканкама і Аршанскага райвыканкама складзены праект комплекснага плана першачарговых мер па развіцці Аршанскага раёна", - сказаў Андрэй Кабякоў.
Кіраўнік урада падкрэсліў, што гэты план не павінен стаць догмай, ён будзе папаўняцца новымі мерапрыемствамі. "Сістэма актуалізацыі ў праекце плана мер закладзена, як і сістэма кантролю за яго выкананнем", - адзначыў ён.
Для выканання задач прапануемага плана неабходна ў кароткія тэрміны вызначыць канкрэтныя галіновыя мерапрыемствы. "Напрыклад, па Аршанскім інструментальным заводзе трэба дакладна распісаць, калі будуць праведзены дадатковыя даследаванні рынкаў гатовай прадукцыі і абсталявання, перагаворы з пастаўшчыкамі абсталявання, банкамі і страхавымі арганізацыямі адпаведных краін для ўваходжання ў замежныя крэдытныя лініі", - даручыў прэм'ер-міністр.
"Цяпер трэба выпрацаваць максімальна падрабязную схему работы з тэрмінамі, адказнымі, прапрацоўкай крыніц фінансавання, - лічыць Андрэй Кабякоў. - Па кожным прадпрыемстве, якое ўвайшло ў наш план (а гэта будуць практычна ўсе прадпрыемствы), павінна быць назначана адпаведная службовая асоба, якая адказвае за эфектыўнасць рэалізуемых мер".
Асноўная задача для раёна - рост аб'ёмаў і эфектыўнасці вытворчасці тавараў і паслуг. Асаблівая ўвага будзе ўдзелена загрузцы прадпрыемстваў, якія працуюць у рэгіёне. "Міністэрства прамысловасці павінна ўважліва паглядзець на наменклатуру прадукцыі, якая выпускаецца Аршанскім інструментальным заводам, і наменклатуру, якая спажываецца нашымі прадпрыемствамі сістэмы Мінпрама. Трэба забяспечыць загрузку прадпрыемстваў у рамках аб'ёмаў, якія яны могуць вырабіць і якія запатрабаваны ўнутры краіны", - акцэнтаваў увагу прэм'ер-міністр.
Для развіцця рэгіёна прапануюцца меры не толькі вытворча-эканамічнага характару. Будзе вывучацца магчымасць правядзення розных спартыўных, культурна-забаўляльных і іншых мерапрыемстваў, якія дапамогуць забяспечыць большы прыток турыстаў, задзейнічаць створаную інфраструктуру. "Папрасіў бы кіраўнікоў сацыяльнага блока ўрада сумесна з аблвыканкамам і райвыканкамам вызначыць, якія міжнародныя і рэспубліканскія мерапрыемствы можна правесці ў раёне, каб павысіць акупнасць дзеючых аб'ектаў", - сказаў кіраўнік урада.
"Узровень развіцця раёна - не той, якім ён павінен быць сёння і як патрабуе ад нас кіраўнік дзяржавы. Падыходзіць да вырашэння пастаўленай Прэзідэнтам задачы мы павінны комплексна. Таму першы крок - гэта выкананне першачарговых мер, якія ўжо ў бліжэйшы час павінны даць вынік. Другі этап - распрацоўка і рэалізацыя сярэднетэрміновай праграмы развіцця раёна", - рэзюмаваў Андрэй Кабякоў.
Што датычыцца сярэднетэрміновай праграмы, то прэм'ер-міністр папярэдзіў Міністэрства эканомікі і Віцебскі аблвыканкам: гэта павінна быць не "абстрактная навуковая праца", а дакладная праграма дзеянняў на аснове глыбокага аналізу існуючай сітуацыі з канкрэтнымі мерапрыемствамі, выканаўцамі, тэрмінамі, прапрацаванымі крыніцамі фінансавання, разлікамі эканамічнай эфектыўнасці.
Сёння на выязным пасяджэнні Прэзідыума Саўміна абмяркоўваецца сацыяльна-эканамічнае развіццё Аршанскага раёна, праблемныя пытанні і шляхі іх вырашэння, перспектывы развіцця раёна да 2020 года і выкананне даручэнняў кіраўніка дзяржавы па развіцці арганізацый і рэалізацыі інвестыцыйных праектаў. У пасяджэнні прымаюць удзел члены Прэзідыума Савета Міністраў, вышэйшыя службовыя асобы, памочнікі кіраўніка дзяржавы, кіраўнікі рэспубліканскіх органаў кіравання, буйных банкаў, Віцебскага аблвыканкама, Аршанскага райвыканкама, кіраўнікі прадпрыемстваў раёна ўсіх форм уласнасці, прадстаўнікі прыватнага бізнесу.-0-
