17 кастрычніка, Мінск /Кар. БЕЛТА/. Дэпутаты Мінскага абласнога Савета дэпутатаў зацвердзілі сёння стаўкі адзінага падатку для фізічных асоб па новых відах дзейнасці, якія не патрабуюць рэгістрацыі ў якасці індывідуальнага прадпрымальніка, перадае карэспандэнт БЕЛТА.
"Мы распрацавалі стаўкі, зыходзячы з існуючай практыкі. Па сумах яны мінімальныя і сярэднія. Арыентаваліся на іншыя вобласці, адрозненні нязначныя - на Br1-2, дзесьці Br5. Але Мінскі раён у нас прыраўноўваецца да абласнога цэнтра, тут стаўкі будуць крыху вышэйшыя - на ўзроўні абласных цэнтраў", - растлумачыў начальнік інспекцыі МПЗ па Мінскай вобласці Уладзімір Бурш. На яго думку, самае важнае, што змяненні ў заканадаўстве садзейнічаюць самазанятасці людзей, а павелічэнне паступленняў у бюджэт ад плацельшчыкаў адзінага падатку будзе ў любым выпадку - штогод іх колькасць павялічваецца ў сярэднім на 10 працэнтаў.
У адпаведнасці з указам нумар 337 "Аб рэгуляванні дзейнасці фізічных асоб" для развіцця самазанятасці насельніцтва фізічным асобам прадастаўлена права без праходжання працэдуры дзяржрэгістрацыі ў якасці індывідуальнага прадпрымальніка самастойна рэалізоўваць некаторыя віды тавараў, а таксама ажыццяўляць асобныя віды дзейнасці, звязаныя з аказаннем паслуг (выкананнем работ), якія не адносяцца да прадпрымальніцтва. Пры гэтым фізічныя асобы праводзяць выплату адзінага падатку з індывідуальных прадпрымальнікаў і іншых фізічных асоб. Яны не абавязаны весці ўлік даходаў і расходаў, а таксама прадстаўляць падатковую справаздачнасць. У сувязі з тым, што пералік відаў дзейнасці, якія не адносяцца да прадпрымальніцкай, пашырыўся, у мінулагодняе рашэнне Мінаблсавета ўнесены дапаўненні па стаўках адзінага падатку для фізічных асоб па дадатковых відах дзейнасці.
Нагадаем, пералік папоўніўся вялікім спектрам заняткаў. І памеры базавых ставак адзінага падатку дыферэнцыруюцца ў залежнасці ад населеных пунктаў: у першую групу ўваходзяць Мінск, Мінскі раён, Брэст, Віцебск, Гомель, Гродна, Магілёў, у другую - Баранавічы, Бабруйск, Барысаў, Жлобін, Жодзіна, Ліда, Мазыр, Маладзечна, Наваполацк, Орша, Пінск, Полацк, Рэчыца, Светлагорск, Слуцк, Салігорск, у трэцюю - іншыя. Так, стаўкі адзінага падатку пры рэалізацыі хлебабулачных і кандытарскіх вырабаў, гатовай кулінарнай прадукцыі для першай групы населеных пунктаў складуць Br16-97, для другой - Br15-60 і для трэцяй - Br10-60. Пры прадастаўленні фізічным асобам жылых памяшканняў, садовых домікаў, дач для кароткатэрміновага пражывання стаўкі адзінага падатку будуць складаць Br15-145, Br42-145 і Br23-120 адпаведна за кожнае жылое памяшканне. Памер базавай стаўкі адзінага падатку за выкананне работ і аказанне паслуг па дызайне інтэр'ераў, графічным дызайне, афармленні (упрыгажэнні) аўтамабіляў, унутранай прасторы капітальных будынкаў, памяшканняў, іншых месц, мадэляванне прадметаў афармлення інтэр'ера, тэкстыльных вырабаў, мэблі, адзення і абутку, прадметаў асабістага карыстання і бытавых вырабаў складзе Br55-97, Br50-87 і Br30-57 адпаведна. У цэлым самыя нізкія памеры ставак устаноўлены пры распілоўцы і колцы дроў, пагрузцы і разгрузцы грузаў - Br5-39, Br4,5-37 і Br4-18 адпаведна. Па іншых пунктах з пераліку памер адзінага падатку ў залежнасці ад населенага пункта і віду дзейнасці вар'іруецца ад Br21 да Br145.
На працягу 9 месяцаў гэтага года ў Мінскай вобласці сталі на ўлік і выплацілі адзіны падатак з індывідуальных прадпрымальнікаў і іншых фізічных асоб за ажыццяўленне відаў дзейнасці, якія не патрабуюць дзяржаўнай рэгістрацыі ў якасці індывідуальных прадпрымальнікаў, 2271 грамадзянін. У бюджэт паступіла Br170,2 тыс., што да ўзроўню мінулага года ў бягучых цэнах склала 119,8 працэнта. Найбольшая колькасць фізічных асоб аказвалі паслугі рэпетытарства (483 чалавекі) і па вырошчванні сельгаспрадукцыі, драбленні зерня, выпасе жывёлы (373 чалавекі), а таксама займаліся рэалізацыяй на гандлёвых месцах і спецыяльна ўстаноўленых месцах твораў жывапісу, графікі, скульптуры, вырабаў народных промыслаў уласнай вытворчасці, прадукцыі кветаводства, дэкаратыўных раслін, іх насення і расады, жывёл за выключэннем кацянят і шчанят (803 чалавекі).-0-
