16 верасня, Мінск /Кар. БЕЛТА/. У Беларусі зарэгістравана спецыяльная фінансавая арганізацыя - Агенцтва па рэструктурызацыі абавязацельстваў і сек'юрытызацыі актываў, паведамілі БЕЛТА ў агенцтве.
Асноўнай мэтай арганізацыі з'яўляецца садзейнічанне развіццю нацыянальнага рынку каштоўных папер і стварэнне ўмоў для прыцягнення новых інвестыцый у эканоміку з выкарыстаннем інавацыйных фінансавых інструментаў. У адпаведнасці з указам нумар 154, агенцтва надзелена асаблівым прававым статусам і будзе ажыццяўляць выключны від дзейнасці - сек'юрытызацыю актываў. Статутны фонд агенцтва зарэгістраваны ў памеры Br52 млн. Чакаецца, што кошт актываў, першапачаткова перададзеных арганізацыі для здзелак сек'юрытызацыі, перасягне Br400 млн.
Сек'юрытызацыя (ад англійскага securities - "каштоўныя паперы") - фінансавы тэрмін, які азначае адну з форм прыцягнення фінансавання шляхам выпуску каштоўных папер, забяспечаных актывамі, генерыруючымі стабільныя грашовыя патокі. "Інавацыйны спосаб прыцягнення сродкаў атрымаў шырокае прызнанне ва ўсім свеце, а цяпер будзе выкарыстоўвацца і ў Беларусі. Размова ідзе пра механізм, пры якім фінансавыя актывы спісваюцца з балансу банка або прадпрыемства, аддзяляюцца ад астатняй маёмасці і перадаюцца агенцтву па сек'юрытызацыі. Затым такія актывы рэфінансуюцца на грашовым рынку або рынку капіталу пры дапамозе выпуску Asset-Backed Securities - ABS (каштоўныя паперы, забяспечаныя актывамі), або шляхам атрымання сіндыкаванага крэдыту", - растлумачылі ў агенцтве.
Дзейнасць арганізацыі будзе накіравана на рэфінансаванне іпатэчных крэдытаў на жылую і камерцыйную нерухомую маёмасць, крэдытаў для малога і сярэдняга бізнесу, на рэалізацыю вялікіх інвестыцыйных і інфраструктурных праектаў, спажывецкага крэдытавання і аўтакрэдытаў. Чакаецца, што ў бліжэйшы час агенцтва ажыццявіць пілотную здзелку па сек'юрытызацыі пула банкаўскіх крэдытаў у памеры 20 млн еўра, якая стане першай такой здзелкай у гісторыі нацыянальнага фінансавага рынку.
Дзейнасць агенцтва будзе таксама накіравана на трансфармацыю таксічных актываў, дрэнных даўгоў, дэбіторскай запазычанасці прадпрыемстваў і банкаў у ліквідныя каштоўныя паперы, дае магчымасць ачысціць баланс арганізацый ад праблемнай запазычанасці і правесці аздараўленне іх дзейнасці.-0-
