25 мая, Мінск /Кар. БЕЛТА/. У Беларусі плануецца выкарыстоўваць 20,3 працэнта цвёрдых камунальных адходаў (ЦКА) у 2018 годзе, паведаміла сёння на прэс-канферэнцыі галоўны спецыяліст па інфармацыйнай рабоце ДУ "Аператар другасных матэрыяльных рэсурсаў" Ніна Кульбеда, перадае карэспандэнт БЕЛТА.
"У 2017 годзе доля атрымання другасных матэрыяльных рэсурсаў (ДМР) з цвёрдых камунальных адходаў склала каля 17 працэнтаў. У адпаведнасці з Нацыянальнай стратэгіяй па абыходжанні з ЦКА і ДМР да 2035 года, перад намі стаіць задача ў 2018 годзе атрымаць 20,3 працэнта ДМР з цвёрдых камунальных адходаў. Іншымі словамі, пятая частка гэтых адходаў павінна пайсці на паўторнае выкарыстанне ў якасці другаснай сыравіны. Цяперашняя інфраструктура дае магчымасць дасягнуць гэтага выніку", - сказала Ніна Кульбеда.
У 2017 годзе было сабрана 654 тыс. т другасных матэрыяльных рэсурсаў, што на 9 працэнтаў больш, чым у 2016 годзе. Гэта адходы паперы, шкла, палімерныя адходы, зношаныя шыны, адпрацаванае масла, старая бытавая і камп'ютарная тэхніка. "У студзені-красавіку 2018 года сабрана 207 тыс. т другасных матэрыяльных рэсурсаў. Параўнанне з аналагічным перыядам мінулага года сведчыць аб тым, што і ў бягучым годзе павінна захавацца дадатная дынаміка збору ў цэлым па краіне. Найбольшы рост за чатыры месяцы назіраецца па зборы адходаў электроннага і электрычнага абсталявання - у 1,8 раза. Збор адпрацаваных машынных масел узрос на 43 працэнты, адходаў паперы - амаль на 12 працэнтаў, палімерных адходаў - 7,3 працэнта. Павялічыўся і збор зношаных шын", - адзначыла спецыяліст.
Ніна Кульбеда расказала аб асноўных напрамках работы ДУ "Аператар другасных матэрыяльных рэсурсаў" у 2018 годзе. У прыватнасці, за кошт паступаючых сродкаў вытворцаў і пастаўшчыкоў тавараў і ўпакоўкі прадоўжыцца эканамічнае стымуляванне здабывання ДМР з цвёрдых камунальных адходаў праз выплату кампенсацый тым арганізацыям, якія збіраюць ДМР і накіроўваюць іх на выкарыстанне або абясшкоджванне. "Прадоўжыцца і развіццё інфраструктуры паасобнага збору адходаў і іх падрыхтоўкі да выкарыстання, у тым ліку работа па ўстаноўцы кантэйнераў для раздзельнага збору адходаў. На гэты год запланавана набыццё больш як 18 тыс. кантэйнераў для збору адходаў шкла, паперы, пластыку, змешанага збору ДМР. З вялікіх праектаў сродкі вытворцаў і пастаўшчыкоў у бягучым годзе будуць накіраваны ў тым ліку на мадэрнізацыю ААТ "Папяровая фабрыка "Спартак", стварэнне ў Гродзенскай вобласці вытворчасці RDF-паліва з камунальных адходаў, падрыхтоўку ўкаранення ў краіне дэпазітна-залогавай сістэмы збору ўпакоўкі, а таксама на будаўніцтва смеццеперапрацоўчага завода ў Віцебску", - дадала яна.
У Беларусі 420 арганізацый займаецца зборам другасных матэрыяльных рэсурсаў і іх падрыхтоўкай да выкарыстання. У жылым сектары ўстаноўлена каля 87 тыс. спецыяльных кантэйнераў для збору адходаў паперы, шкла, пластыку, у тым ліку каля 9 тыс. кантэйнераў устанавілі ў 2017 годзе. Ажыццяўляецца таксама збор адпрацаваных элементаў сілкавання, энергазберагальных лямпаў у гандлёвых аб'ектах: устаноўлена амаль 3,3 тыс. кантэйнераў для збору батарэек і больш за 700 - для збору ртуцьзмяшчальных лямпаў. У механізме па зборы ДМР значную ролю адыгрывае і бясплатны вываз з дамоў адходаў электроннага і электрычнага абсталявання сістэмай ВТІ-таксі, сістэма нарыхтоўчых пунктаў другаснай сыравіны (усяго функцыянуе больш як 1,6 тыс. пунктаў).-0-
