30 ліпеня, Мінск /Кар. БЕЛТА/. Тэрміновыя рублёвыя ўклады насельніцтва ў I паўгоддзі выраслі на 12,3 працэнта. Такія даныя прыводзяцца ў дакладзе намесніка старшыні праўлення Нацыянальнага банка Сяргея Калечыца на пашыраным пасяджэнні праўлення аб выніках рэалізацыі грашова-крэдытнай палітыкі Беларусі за I паўгоддзе, паведамляе БЕЛТА.
Да канца бягучага года Нацыянальны банк будзе імкнуцца захаваць нейтральнасць манетарных умоў. "Важна, каб і стаўка рэфінансавання, і стаўкі грашовага рынку, і стаўкі крэдытнага і дэпазітнага рынку былі блізкімі паміж сабой, а іх рух быў сінхронны", - адзначаецца ў дакладзе.
У сувязі з гэтым Нацыянальны банк захоўвае свае падыходы па ўстанаўленні і рэгуляванні банкамі працэнтнай палітыкі. Аб эфектыўнасці прынятых і рэалізаваных Нацбанкам рашэнняў сведчыць аналіз дынамікі тэрміновых укладаў фізічных і юрыдычных асоб і ўзроўню працэнтных ставак, які складваецца па іх. Пры гістарычна мінімальным значэнні працэнтнай стаўкі па ўкладах астаткі тэрміновых укладаў у нацыянальнай валюце прадаўжаюць павялічвацца. Па сутнасці, цяпер схільнасць суб'ектаў гаспадарання і насельніцтва да зберажэнняў вызначаецца не толькі даходнасцю па ўкладах. У студзені-чэрвені на дэпазітным рынку назіраўся рост тэрміновых рублёвых укладаў насельніцтва (на 12,3 працэнта). Доля безадзыўных укладаў у агульным аб'ёме ўкладаў насельніцтва ў нацыянальнай валюце павялічылася з 52,4 працэнта ў снежні 2017 года да 68,8 працэнта ў чэрвені 2018 года. Нязначна, але вырасла доля доўгатэрміновых укладаў у агульным аб'ёме безадзыўных укладаў насельніцтва: з 67,8 працэнта ў снежні 2017 года да 67,9 працэнта ў чэрвені 2018-га.
"Неабходна замацаваць такую дынаміку, але для гэтага патрэбна поўнае разуменне і падтрымка банкаўскай супольнасці. Перш за ўсё размова ідзе аб неабходнасці безумоўнага выканання ўсімі банкамі рэкамендацый Нацыянальнага банка ў частцы захавання і своечасовага ўстанаўлення максімальных працэнтных ставак па ўкладах. Гэта датычыцца і даходнасці выпускаемых банкамі аблігацый", - падкрэслілі ў Нацбанку.
Адзіныя падыходы павінны прымяняцца і ў частцы ўстанаўлення працэнтных ставак на крэдытным рынку. Істотнай розніцы ва ўзроўні працэнтных ставак па новых крэдытах у розных банках быць не павінна, паколькі такія дзеянні прыводзяць да нядобрасумленнай канкурэнцыі, лічаць у Нацбанку.-0-
