13 снежня, Мінск /Кар. БЕЛТА/. Тавараабарот Беларусі і Чэлябінскай вобласці (Расія) у студзені-кастрычніку павялічыўся на 35,6 працэнта ў параўнанні з аналагічным мінулагоднім перыядам. Аб гэтым БЕЛТА паведамілі ў Міністэрстве антыманапольнага рэгулявання і гандлю па выніках пасяджэння сумеснай рабочай групы па супрацоўніцтве паміж Беларуссю і Чэлябінскай вобласцю, якое адбылося ў Мінску.
У МАРГ расказалі, што тавараабарот паміж Беларуссю і Чэлябінскай вобласцю ў студзені-кастрычніку 2017 года склаў $235,4 млн. Аснову экспарту Беларусі ў Чэлябінскую вобласць складаюць пастаўкі грузавых аўтамабіляў, дарожнай і будаўнічай тэхнікі, шын, халадзільнікаў і маразільнікаў, частак і прылад для аўтамабіляў і трактароў.
На пасяджэнні абмеркавана шырокае кола пытанняў гандлёва-эканамічнага, навукова-тэхнічнага, культурнага супрацоўніцтва і супрацоўніцтва ў сферы аховы здароўя.
З мэтай нарошчвання ўзаемнага тавараабароту прынята рашэнне аб уключэнні ў праект Плана мерапрыемстваў па развіцці гандлёва-эканамічнага, навукова-тэхнічнага і культурнага супрацоўніцтва на 2018-2021 гады канкрэтных мерапрыемстваў па перспектыўных напрамках у сферы прамысловасці, сельскай гаспадаркі, ІТ-тэхналогій, фармацэўтыкі, аховы здароўя, культуры, турызму, міжрэгіянальнага супрацоўніцтва.-0-
