Сцяг Пятніца, 29 сакавіка 2024
Усе навіны
Усе навіны
Эканоміка
31 кастрычніка 2019, 15:52

Сусветны банк выдзеліць амаль $100 млн на пашырэнне ўстойлівага энергакарыстання ў Беларусі

31 кастрычніка, Мінск /Кар. БЕЛТА/. Савет выканаўчых дырэктараў Сусветнага банка зацвердзіў фінансаванне ў памеры $99,3 млн для новага праекта па пашырэнні ўстойлівага энергакарыстання ў Беларусі, паведамілі БЕЛТА ў банку.

Акрамя Сусветнага банка, фінансаванне для рэалізацыі праекта прадастаўляецца Еўрапейскім інвестыцыйным банкам (таксама $99,3 млн) і Глабальным экалагічным фондам ($3,65 млн). Агульны бюджэт праекта складзе $202,25 млн.

Праект накіраваны на пашырэнне маштабаў устойлівага энергакарыстання пры дапамозе пераводу кацельняў, якія выкарыстоўваюць прыродны газ, на драўняную біямасу, а таксама правядзенне цеплавой мадэрнізацыі шматкватэрных жылых будынкаў. Акрамя таго, праект прадугледжвае аказанне тэхнічнай дапамогі, накіраванай на рэалізацыю страхавой праграмы па цеплавой мадэрнізацыі, і павышэнне ўзроўню інфармаванасці аб новым фінансавым механізме, што дае магчымасць домагаспадаркам суфінансаваць мерапрыемствы па ўцяпленні шматкватэрных дамоў.

Першы кампанент праекта будзе накіраваны на зніжэнне спажывання прыроднага газу пры дапамозе замены газавых катлоў катламі на біямасе, устаноўкі абсталявання для драбнення драўніны і палівасховішчаў, а таксама мадэрнізацыі цеплавых сетак. Другі кампанент - на правядзенне цеплавой мадэрнізацыі шматкватэрных дамоў у дзвюх пілотных абласцях (Гродзенскай і Магілёўскай). Плануецца, што па праекце комплексная цеплавая мадэрнізацыя будзе праведзена прыкладна ў 250 шматкватэрных жылых дамах. Эканомія па рахунках пасля правядзення работ можа дасягаць 40 працэнтаў.

"Сёння многія беларусы хацелі б уцяпліць свае дамы і ўстанавіць у кватэрах сістэмы кантролю ацяплення і ўліку цяпла, аднак у большасці выпадкаў гэта даволі дорага. Мы спадзяёмся, што гранты і доўгатэрміновыя крэдыты, што прадастаўляюцца па гэтым праекце, будуць стымуляваць домагаспадаркі ўкладаць сродкі ў цеплавую мадэрнізацыю і тым самым павышаць узровень камфорту, зніжаць спажыванне цяпла", - сказаў кіраўнік прадстаўніцтва Сусветнага банка ў Беларусі Алекс Крэмер.

Прыняты ў верасні 2019 года ўказ нумар 327 "Аб павышэнні энергаэфектыўнасці шматкватэрных жылых дамоў" дае магчымасць жыльцам правесці цеплавую мадэрнізацыю, атрымаўшы растэрміноўку аплаты да 15 гадоў і да 50 працэнтаў бязвыплатнай субсідыі ад дзяржавы. У 2020-2025 гадах долю дзяржавы ў Гродзенскай і Магілёўскай абласцях прафінансуюць Сусветны банк і Еўрапейскі інвестыцыйны банк.

Беларусь стала членам Сусветнага банка ў 1992 годзе. За час супрацоўніцтва краіне былі выдзелены крэдытныя рэсурсы ў памеры $1,7 млрд. Цяпер інвестыцыйны партфель Сусветнага банка ў Беларусі ўключае восем праектаў на агульную суму $843,41 млн.-0-

Падпісвайцеся на нас у
Twitter
Топ-навіны
Свежыя навіны Беларусі