21 лістапада, Мінск /Кар. БЕЛТА/. Прэм'ер-міністр Беларусі Сяргей Румас накіраваўся з двухдзённым рабочым візітам у Злучанае Каралеўства Вялікабрытаніі і Паўночнай Ірландыі, перадае карэспандэнт БЕЛТА.
Сёння ў Лондане кіраўнік беларускага ўрада правядзе сустрэчы з членам брытанскай каралеўскай сям'і прынцам Майклам Кенцкім і прэзідэнтам Еўрапейскага банка рэканструкцыі і развіцця Сумам Чакрабарці. Пройдуць перагаворы з кіраўніцтвам кампаніі CAD CAM Automotive, па выніках якіх чакаецца падпісанне пагаднення аб стварэнні зборачнай вытворчасці беларускіх электробусаў у Вялікабрытаніі.
Сяргей Румас 22 лістапада прыме ўдзел у першым інвестыцыйным саміце Еўрапейскага банка рэканструкцыі і развіцця для краін - удзельніц "Усходняга партнёрства". У гэты ж дзень запланаваны сустрэчы з кіраўніцтвам ЕБРР, Еўрапейскага інвестыцыйнага банка. Чакаецца падпісанне дакументаў у мэтах развіцця супрацоўніцтва Беларусі з еўрапейскімі банкамі.
Праграмай рабочага візіту таксама прадугледжаны перагаворы Сяргея Румаса з еўракамісарам па пытаннях пашырэння палітыкі добрасуседства Ёханесам Ханам і прэм'ер-міністрам Украіны Аляксеем Ганчаруком.-0-