9 жніўня, Чалпон-Ата /Кар. БЕЛТА/. У Еўразійскім эканамічным саюзе неабходна прадоўжыць работу па стварэнні аднолькавых умоў гаспадарання і фарміраванні адзіных рынкаў. Аб гэтым заявіў прэм'ер-міністр Беларусі Сяргей Румас сёння на пасяджэнні Еўразійскага міжурадавага савета ў пашыраным фармаце, перадае карэспандэнт БЕЛТА.
"Неабходна прадоўжыць работу па стварэнні аднолькавых умоў гаспадарання на агульнай прасторы Еўразійскага эканамічнага саюза. Пэўная работа ў гэтым напрамку вядзецца. Паступова мы вучымся прымаць рашэнні нацыянальнага ўзроўню з аглядкай на абавязацельствы ў ЕАЭС. Гэта пазітыў", - адзначыў Сяргей Румас. Але ў той жа час прадаўжаюць паступаць запыты прадпрыемстваў і арганізацый па асаблівасцях работы на рынках краін саюза, доступе да дзяржзакупак, спецыфіцы субсідзіравання нацыянальных вытворцаў, арганізацыі транзіту, мытна-тарыфных мерах і іншых пытаннях. Усё гэта патрабуе свайго далейшага разгляду і вырашэння з улікам норм Дагавора аб ЕАЭС, лічыць кіраўнік беларускага ўрада.
У сакавіку бягучага года ўступіла ў сілу Пагадненне аб маркіроўцы тавараў сродкамі ідэнтыфікацыі ў Еўразійскім эканамічным саюзе. Маркіроўка павінна забяспечыць празрыстасць таварных патокаў і спыніць распаўсюджванне кантрафакту. Пры гэтым укараненне сродкаў ідэнтыфікацыі не павінна стаць яшчэ адным інструментам стрымлівання для ўнутранага гандлю. "Таму беларускі бок выступае за ўзважанасць і паслядоўнасць прымаемых па гэтых пытаннях рашэнняў. Лічым, што найбольшы эфект ад рэалізацыі пагаднення будзе дасягацца, калі ў працэсе ідэнтыфікацыі таварных патокаў будуць удзельнічаць усе дзяржавы-члены", - падкрэсліў Сяргей Румас.
Яшчэ адна важная задача ў ЕАЭС - прыняць меры па больш хуткаму пераходу да ўзгодненай, а ў перспектыве і да адзінай прамысловай і аграпрамысловай палітыкі.
"Супрацоўніцтва ў прамысловасці і АПК дасць магчымасць выйсці на новыя інавацыйныя праекты ў Еўразійскім эканамічным саюзе, значна нарасціць аб'ёмы выпуску канкурэнтнай высокатэхналагічнай прадукцыі, садзейнічаць рэалізацыі праграм імпартазамяшчэння", - адзначыў Сяргей Румас.
У саюзе ідзе работа над агульнай канцэпцыяй стратэгічнага планавання адзінай прамысловай і аграрнай палітыкі, развіцця і падтрымкі малога і сярэдняга прадпрымальніцтва, па распрацоўцы і рэалізацыі навукова-тэхнічных праектаў. Адным з апошніх прынятых дакументаў у гэтым напрамку стала красавіцкае рашэнне аб фарміраванні экасістэмы партнёрства, кааперацыі і субкантрактацыі.
"Такія рашэнні з'яўляюцца паказальнымі і накіраваны на стварэнне рэальных умоў для практычнага пашырэння напрамкаў супрацоўніцтва ў сферы прамысловага і аграпрамысловага комплексаў. Цяпер прынцыпова важна падключыць да ўзаемадзеяння ў гэтай галіне прадпрыемствы краін - членаў саюза, прадстаўнікоў дзелавых колаў і малога бізнесу", - падкрэсліў прэм'ер-міністр.
Паводле яго слоў, трэба прадоўжыць сістэмную работу па фарміраванні адзіных рынкаў саюза. Так, прадаўжаецца працэс стварэння энергетычных рынкаў, аднак застаецца неўрэгуляваным важнейшае для беларускага боку пытанне фарміравання суб'ектамі гаспадарання тарыфаў на транспарціроўку газу.
Да 2025 года павінен быць сфарміраваны адзіны транспартны рынак. Сяргей Румас звярнуў увагу, што ў гэтай сферы таксама ёсць сур'ёзныя пытанні, напрыклад - марудная рэалізацыя праграмы развіцця кабатажных перавозак.
Сёння ў парадак дня ўключана пытанне, што датычыцца фарміравання агульнага фінансавага рынку. "Важна з поўнай адказнасцю падысці да гэтай работы, не дапусціць тых памылак і прабелаў, якія ў далейшым стануць перашкодай для паўнацэннай рэалізацыі дамоўленасцей", - падкрэсліў кіраўнік урада.
На думку беларускага боку, фінансавы рынак павінен быць паўнацэнным і сапраўды свабодным, павінен забяспечваць рэальную канкурэнтаздольнасць і аднолькавыя ўмовы для ўдзельнікаў эканамічных адносін унутры саюза.-0-
