19 красавіка, Мінск /Кар. БЕЛТА/. Праект дэкрэта "Аб развіцці прадпрымальніцтва і выключэнні залішніх патрабаванняў, выстаўляемых да бізнесу" знаходзіцца ў высокай ступені гатоўнасці, паведаміў дырэктар дэпартамента па прадпрымальніцтве Міністэрства эканомікі Беларусі Пётр Арушаньянц на пасяджэнні грамадска-кансультатыўнага (экспертнага) савета па развіцці прадпрымальніцтва пры Мінгарвыканкаме, перадае карэспандэнт БЕЛТА.
"За некалькі месяцаў праведзена беспрэцэдэнтная работа. Падрыхтаваны нормы, якія дадуць магчымасць сур'ёзна палепшыць дзелавое асяроддзе, спрасціць і патанніць вядзенне бізнесу. Дакумент знаходзіцца ў высокай ступені гатоўнасці, прапановы бізнес-супольнасці разглядаюцца на ўсіх узроўнях і па розных напрамках", - сказаў Пётр Арушаньянц.
Паводле яго слоў, у праект пастаянна ўносяцца змяненні. Каля 90 працэнтаў норм дэкрэта - прапановы прадпрымальнікаў.
Як паведамлялася, пакет нарматыўных прававых актаў аб спрашчэнні ўмоў вядзення бізнесу ў Беларусі вынесены на грамадскае абмеркаванне. Гэта праекты дэкрэта і некалькіх указаў.
Праектам дэкрэта "Аб развіцці прадпрымальніцтва і выключэнні залішніх патрабаванняў, выстаўляемых да бізнесу" вызначаны прынцыпы ўзаемадзеяння дзяржавы з юрыдычнымі асобамі і індывідуальнымі прадпрымальнікамі, зацверджаны пералікі відаў эканамічнай дзейнасці, якія можна ажыццяўляць па заяўным прынцыпе, а таксама агульныя патрабаванні пажарнай бяспекі, санітарна-эпідэміялагічныя патрабаванні і патрабаванні ў галіне аховы навакольнага асяроддзя. Праектам дакумента ўстаноўлена, што робяць суб'екты гаспадарання пры ажыццяўленні эканамічнай дзейнасці ў сферы грамадскага харчавання, гандлю і бытавога абслугоўвання насельніцтва, вытворчасці харчовай і нехарчовай прадукцыі, пры будаўнічай, транспартнай дзейнасці, у сферы рэкламы.-0-
