9 лютага, Мінск /Кар. БЕЛТА/. Прадукцыйнасць працы ў аграпрамысловым комплексе Беларусі да 2020 года плануецца павялічыць мінімум у 1,3 раза. Аб гэтым заявіў міністр сельскай гаспадаркі і харчавання Леанід Заяц у эфіры тэлеканала "Беларусь 1", паведамляе БЕЛТА.
"Да 2020 года нам неабходна істотна паправіць справы ў аграпрамысловым комплексе. Па-першае, неабходна падняць прадукцыйнасць працы не менш як у 1,3 раза. Па-другое, стаіць задача павялічыць аб'ёмы вытворчасці асноўных відаў прадукцыі, загрузіць перапрацоўчыя прадпрыемствы, тым самым забяспечыць унутраныя патрэбнасці ў прадуктах харчавання, а лішкі ў суме $7 млрд мы павінны рэалізаваць за межы дзяржавы. І, зразумела, неабходна падняць матэрыяльны дабрабыт працаўнікоў аграпрамысловага комплексу", - адзначыў Леанід Заяц.
Падводзячы вынікі работы аграпрамысловага комплексу ў 2017 годзе, Леанід Заяц канстатаваў, што была забяспечана харчовая бяспека дзяржавы, унутраны рынак насычаны айчыннымі прадуктамі харчавання. Дынамічна развіваліся ўсе галіны раслінаводства і жывёлагадоўлі. Палепшыўся фінансавы стан большасці сельгаспрадпрыемстваў. "Упершыню краіна пераадолела 5-тысячны рубеж надою малака на карову, упершыню мы наблізіліся да лічбы $5 млрд ад экспарту прадуктаў харчавання, асвоены 18 новых рынкаў", - сказаў Леанід Заяц.
"Самая галоўная задача на сёння - максімальна эфектыўна выкарыстоўваць унутраныя фактары і з той дзяржаўнай падтрымкай, якая аказваецца, дабівацца больш важкіх паказчыкаў, зніжаць сабекошт, павышаць канкурэнтаздольнасць прадукцыі", - падкрэсліў міністр.
Сёння ў Мінску пройдзе ўрачыстае ўшаноўванне перадавікоў аграпрамысловага комплексу. Удзел у мерапрыемстве прыме Прэзідэнт Беларусі Аляксандр Лукашэнка. На ўрачыстую цырымонію запрошаны больш за 400 чалавек, у тым ліку вышэйшыя службовыя асобы, кіраўнікі міністэрстваў і ведамстваў, мясцовых органаў улады, лідары грамадскіх арганізацый. Галоўнымі ж удзельнікамі свята будуць менавіта тыя, хто непасрэдна кожны дзень заняты ў АПК - кіраўнікі гаспадарак, перапрацоўчых арганізацый, а таксама якія абслугоўваюць аграпрамысловы комплекс, фермеры, перадавікі сельгасвытворчасці, заслужаныя работнікі гэтай сферы.-0-
