16 сакавіка, Мінск /Кар. БЕЛТА/. Павышаны попыт на спажывецкія крэдыты ў Беларусі хутка пойдзе на спад. Такі пункт гледжання выказала карэспандэнту БЕЛТА фінансавы кансультант TeleTrade (ТАА "ТэлетрэйдБел") Жанна Кулакова.
"Рост спажывецкага крэдытавання ў Беларусі сапраўды ёсць, і гэта тэндэнцыя назіралася ўжо ў мінулым годзе. Людзі пачалі актыўна браць крэдыты - гэта лагічны вынік усяго, што адбывалася ў эканоміцы і на фінансавым рынку: значна знізіліся стаўкі па крэдытах, плюс Нацбанк спрасціў доступ да крэдытаў, адмяніўшы абавязковае прадастаўленне даведак аб даходах. Акрамя таго, у насельніцтва падраслі зарплаты", - адзначыла эксперт.
Пры гэтым Жанна Кулакова растлумачыла, што хутка такі павышаны попыт пойдзе на спад. "Тыя, хто хацеў купіць што-небудзь у крэдыт, ужо гэта зрабілі. Беларусы не будуць вельмі закрэдытоўвацца, нашы людзі вельмі адказна падыходзяць да крэдытаў. Згодна са статыстыкай, у нас традыцыйна невялікая пратэрмінаваная запазычанасць - людзі не схільныя браць на сябе непад'ёмныя абавязацельствы", - падкрэсліла яна.
Акрамя таго, фінансавы кансультант звярнула ўвагу, што намецілася невялікая тэндэнцыя да росту працэнтных ставак. "Узросшы попыт на крэдыты - гэта адзін з фактараў, якія паўплывалі на скарачэнне збыткоўнай ліквіднасці банкаў. Цяпер банкі нават перыядычна маюць дэфіцыт ліквіднасці, а Нацбанк з пачатку года правёў некалькі крэдытных аўкцыёнаў. Вынікам гэтага з'яўляецца невялікі рост ставак і па дэпазітах, і па крэдытах", - сказала Жанна Кулакова.
Станоўчым вынікам такога буму на рынку спажывецкага крэдытавання з'яўляецца рост унутранага попыту. "Адпаведна, прадпрыемствы атрымліваюць магчымасць больш вырабляць, а прадаўцы - больш прадаваць. І ўсё гэта станоўча ўплывае на дынаміку ВУП. Негатыўным вынікам можна назваць рост імпарту - у Беларусі заўсёды, як толькі пачынае расці спажывецкі попыт, расце імпарт. Гэта прыводзіць да таго, што пагаршаецца сальда знешняга гандлю", - канстатавала яна.
Паводле даных статыстычнага бюлетэня Нацбанка, на 1 лютага запазычанасць па крэдытах, выдадзеных беларускімі банкамі фізічным асобам, складала больш за Br9,1 млрд.-0-