21 верасня, Мінск /Кар. БЕЛТА/. Палата падатковых кансультантаў ствараецца ў Беларусі, паведаміла карэспандэнту БЕЛТА намеснік начальніка галоўнага ўпраўлення арганізацыі кантрольнай дзейнасці Міністэрства па падатках і зборах Галіна Кавалёва, каменціруючы ўказ нумар 338 "Аб падатковым кансультаванні".
"Для падрыхтоўкі падатковых кансультантаў, іх атэстацыі спатрэбіцца пэўны час. Таму ўказам прадугледжаны пераходны перыяд да 1 студзеня 2019 года, пасля чаго ўводзіцца забарона на аказанне паслуг па падатковым кансультаванні асобам, якія ажыццяўляюць цяпер такую дзейнасць без атрымання статусу падатковага кансультанта. На першапачатковым этапе асноўныя паўнамоцтвы па каардынацыі дзейнасці падатковых кансультантаў, забеспячэнні стварэння ўмоў для эфектыўнай работы гэтага інстытута ўскладаюцца на Міністэрства па падатках і зборах. Цяпер у Беларусі ствараецца Палата падатковых кансультантаў. Пасля завяршэння пераходнага перыяду будзе разглядацца пытанне аб перадачы такіх функцый гэтай арганізацыі", - сказала Галіна Кавалёва.
Яна адзначыла, што ўказ распрацаваны з улікам міжнароднага вопыту, з удзелам айчынных і міжнародных незалежных экспертаў, прадстаўнікоў бізнес-саюзаў. "Сёння падатковы ўлік, як правіла, ажыццяўляюць работнікі прадпрыемстваў, якія часта не валодаюць дастатковым вопытам і ведамі ў галіне падаткаабкладання. Такі падыход павышае рызыкі ўчынення памылак. Указам прадугледжваецца ўкараненне інстытута падатковых кансультантаў. Іх паслугі будуць уключаць як растлумачэнне падатковага заканадаўства, падатковае планаванне, так і комплекснае абслугоўванне кліента. Паслугі па падатковым кансультаванні будуць мець права аказваць індывідуальныя прадпрымальнікі, якія маюць кваліфікацыйны атэстат падатковага кансультанта, а таксама юрыдычныя асобы, у штаце якіх ёсць адпаведным вобразам атэставаныя спецыялісты", - адзначыла намеснік начальніка галоўнага ўпраўлення і падкрэсліла, што для суб'ектаў прадпрымальніцкай дзейнасці зварот да падатковых кансультантаў будзе мець выключна добраахвотны характар.
Галіна Кавалёва таксама звярнула ўвагу, што спецыялісты, якія хочуць аказваць паслугі па падатковым кансультаванні, павінны будуць здаць кваліфікацыйны экзамен і ў далейшым рэгулярна павышаць сваю кваліфікацыю, не радзей як адзін раз на працягу двух каляндарных гадоў.
Таксама важнай нормай указа з'яўляецца ўвядзенне абавязковага страхавання прафесійнай адказнасці падатковага кансультанта. "За кошт страхоўкі ў выпадку няякаснага аказання паслуг па падатковым кансультаванні будуць кампенсавацца панесеныя кліентам страты - пені, налічаныя за нясвоечасовую выплату падаткаў, а таксама адміністрацыйныя спагнанні", - растлумачыла намеснік начальніка галоўнага ўпраўлення.
Дзеянне ўказа не распаўсюджваецца на бухгалтараў, юрыстаў, адвакатаў, аўдытараў. "Яны будуць выконваць абавязкі ў рамках сваёй прафесійнай дзейнасі. Да гэтага ўказ па падатковым кансультаванні не будзе мець ніякіх адносін", - растлумачыла Галіна Кавалёва.-0-
