29 лістапада, Мінск /Кар. БЕЛТА/. Новая рэструктурызацыя даўгоў дзяржпрадпрыемстваў не стварае рызык для бюджэту, паведаміў сёння журналістам міністр фінансаў Максім Ермаловіч, перадае карэспандэнт БЕЛТА.
Максім Ермаловіч нагадаў, што ў 2015-2016 гадах удалося знайсці рашэнні для прадпрыемстваў, якія апынуліся ў крызіснай сітуацыі. "Міністэрства фінансаў правяло работу з банкамі і бюджэтам, каб захаваць прадпрыемствы і іх вытворчы патэнцыял, не спыніць работу, стварыць умовы, каб яны маглі ва ўмовах 2015-2016 года прадаўжаць працаваць і папаўняць бюджэт", - адзначыў ён. Тады была праведзена рэструктурызацыя даўгоў дзяржпрадпрыемстваў.
"Цяпер фактычна заканчваецца пяцігадовы перыяд рэструктурызацыі гэтых даўгоў. Па частцы прадпрыемстваў мы бачым істотнае паляпшэнне сітуацыі, яны спраўляюцца са сваімі бягучымі абавязацельствамі і пачынаюць паэтапна разлічвацца перад банкамі і бюджэтам. Можна сказаць, гэтыя прадпрыемствы выйшлі на ўстойлівы трэк", - растлумачыў міністр. У той жа час у некаторых прадпрыемстваў праблемы захоўваюцца, даводзіцца прымаць новыя рашэнні па рэструктурызацыі іх абавязацельстваў. Гэта датычыцца сельгасарганізацый, а таксама шэрага прадпрыемстваў, па якіх сітуацыя не паляпшаецца, у тым ліку з-за сённяшняга стану знешніх рынкаў.
"Сёння на разглядзе ў Міністэрстве фінансаў ёсць шэраг праектаў указаў, якія прадугледжваюць новую рэструктурызацыю абавязацельстваў дзяржпрадпрыемстваў. Якіх-небудзь дадатковых рызык для бюджэту гэта не нясе. Гэтыя даўгі ўжо былі раней рэструктурызаваны, і размова ідзе аб тым, каб гэту рэструктурызацыю проста прадоўжыць", - удакладніў Максім Ермаловіч. Ён падкрэсліў, што Міністэрства фінансаў адказна ставіцца да фіскальных рызык, пастаянна іх ацэньвае і маніторыць, таму невяртанне сродкаў некаторымі дзяржаўнымі прадпрыемствамі не стварае пагроз бюджэтнай збалансаванасці.-0-
