16 мая, Мінск /Кар. БЕЛТА/. Малочная прадукцыя "Бабулінай крынкі" паступіла ў чатыры магазіны гандлёвай сеткі кітайскай правінцыі Цзянсу, паведамілі карэспандэнту БЕЛТА ў генеральным консульстве Беларусі ў Шанхаі.
Генеральны консул у Шанхаі Валерый Мацаль на палях Шанхайскай міжнароднай выстаўкі харчовай прадукцыі SIAL абмеркаваў з кіраўнікамі вядучых карпарацый гэтага кітайскага рэгіёна "Хай Хоўп" і "Суга Супермаркет" прасоўванне пітнога малака вытворчасці "Бабуліна крынка" на рынак правінцыі Цзянсу - пабраціма Магілёўскай вобласці. Дамоўленасць аб рэалізацыі гэтага праекта была дасягнута ў верасні 2018 гадоў ў ходзе візіту ў Магілёў губернатара правінцыі У Чжэнлуна. У канцы красавіка першы кантэйнер пітнога малака магілёўскага прадпрыемства прыбыў у адміністрацыйны цэнтр правінцыі - горад Нанкін, а ўжо ў маі малако паступіла на прылаўкі чатырох магазінаў карпарацыі "Суга Супермаркет", якая валодае сеткай больш як 1,7 тыс. гандлёвых кропак.
Кіраўнікі абедзвюх кітайскіх кампаній выказалі ўпэўненасць, што попыт на прадукцыю магілёўскага прадпрыемства, якая вызначаецца высокай якасцю і канкурэнтнай цаной, будзе высокім.
У час сустрэчы дасягнута дамоўленасць аб правядзенні ў канцы мая ў Нанкіне прэзентацыі малочнай прадукцыі магілёўскага прадпрыемства, у якой прымуць удзел прадстаўнікі дэпартамента камерцыі правінцыі, кіраўнікі гэтых кампаній, генконсул Беларусі Валерый Мацаль.
Кітайскія кампаніі падтрымалі прапанову генконсульства аб расшырэнні лінейкі пастаўляемай на рынак беларускай прадукцыі, праявіўшы цікавасць да закупак рапсавага алею, марожанага, угнаенняў з торфу, піламатэрыялаў. Кітайскія партнёры таксама падтрымалі прапанову аб больш шырокім выкарыстанні чыгуначных кантэйнерных перавозак для дастаўкі беларускай прадукцыі на рынак Цзянсу ў рамках эканамічнага пояса Шаўковага шляху.-0-
