24 верасня, Мінск /Кар. БЕЛТА/. Белкаапсаюз не супраць адкрыцця гандлёвых кропак прыватнымі прадпрыемствамі ў малых населеных пунктах, але жадаючых пакуль няма. Аб гэтым заявіў журналістам старшыня праўлення Белкаапсаюза Валерый Іваноў, перадае карэспандэнт БЕЛТА.
"Згодна з заканадаўствам, любы жадаючы можа адкрываць любую гандлёвую кропку ў любым населеным пункце, ніхто не забараняе. І спажыўкааперацыя не мае права і магчымасці забараніць яе адкрыццё. У некаторых выпадках мы нават падтрымліваем іх: дамаўляемся забяспечваць некаторымі відамі тавараў. Але асабліва жадаючых няма. Таму што, як бы там ні было, работа ў населеных пунктах да 200 чалавек для любой гандлёвай кропкі пры ўмове вытрымлівання асартыменту, цаны і астатняга стратная", - адзначыў Валерый Іваноў.
Кіраўнік Белкаапсаюза сказаў, што ў той жа час у яго арганізацыі такія гандлёвыя кропкі ёсць, хоць яны і нерэнтабельныя. "І мы іх закрыць не можам, таму што для насельніцтва гэта адзіная кропка, куды можна прыйсці за пакупкамі. Тут ужо ў наяўнасці сацыяльная функцыя, якую выконвае спажыўкааперацыя", - падкрэсліў ён.
Валерый Іваноў праінфармаваў, што ў цэлым дынаміка развіцця Белкаапсаюза дадатная ў такіх напрамках, як экспарт тавараў, зверагадоўля, закупка лішкаў сельскагаспадарчай і дзікарослай прадукцыі ў насельніцтва, цэнавая палітыка спажыўкааперацыі. У той жа час дапрацоўкі патрабуюць такія сферы дзейнасці арганізацыі, як якасць гандлёвага абслугоўвання сельскага насельніцтва, забеспячэнне яго ўсімі відамі неабходных тавараў, у тым ліку і імпартных, а таксама своечасовасць разлікаў з пастаўшчыкамі.-0-
