6 лістапада, Мінск /Кар. БЕЛТА/. Еўрапейскі саюз гатовы аказваць Беларусі дапамогу ў развіцці прыватнага сектара эканомікі. Аб гэтым заявіла сёння журналістам на палях "Кастрычніцкага эканамічнага форуму" (KEF-2018) кіраўнік прадстаўніцтва Еўрапейскага саюза ў Беларусі Андрэа Віктарын, перадае карэспандэнт БЕЛТА.
"Мы гатовы падтрымліваць (Беларусь. - Заўвага БЕЛТА) у тых сферах, якія краіна сама вызначыць, у прыватнасці ў плане развіцця прыватнага сектара", - сказала Андрэа Віктарын. Паводле яе слоў, у гэтым напрамку ЕС ужо робіцца даволі шмат. У супрацоўніцтве з міжнароднымі фінансавымі інстытутамі распрацавана дарожная карта падтрымкі малога і сярэдняга прадпрымальніцтва. На думку Андрэа Віктарын, трэба сканцэнтравацца менавіта на развіцці прыватнага сектара, паколькі ён з'яўляецца своеасаблівым фундаментам эканомікі. "Акрамя таго, мы лічым, неабходна актывізаваць развіццё рэгіёнаў", - дадала кіраўнік прадстаўніцтва ЕС.
У час дыскусіі Андрэа Віктарын выказалася аб падыходах у прыцягненні замежных інвестыцый. Яна лічыць важным займацца вывучэннем інтарэсаў інвестараў. "Мы са свайго боку гатовы падтрымліваць Беларусь з дапамогай фонду структурных рэформ, а таксама гатовы дзяліцца ўласным вопытам праз праект "Твінінг", - адзначыла кіраўнік прадстаўніцтва ЕС. - Я вельмі рада, што ў нас цяпер запушчаны праект з Нацыянальным банкам, у якім удзельнічае кансорцыум з Польшчы, Германіі і Літвы".
Акрамя таго, паводле слоў Андрэа Віктарын, у Беларусі працуюць два праекты пры падтрымцы Еўрапейскага саюза па стымуляванні і развіцці прыватнага сектара.-0-
