16 кастрычніка, Масква /Эдуард Півавар - БЕЛТА/. Стварэнне адзінай лічбавай прасторы ў прамысловасці і АПК, лакалізацыя тэхналогій, а таксама эфектыўнае ўзаемадзеянне ў навукова-тэхнічнай і інавацыйнай сферах стануць прыярытэтамі супрацоўніцтва краін ЕАЭС з Кітаем. Аб гэтым заявіў член Калегіі (міністр) па прамысловасці і аграпрамысловым комплексе Еўразійскай эканамічнай камісіі Аляксандр Субоцін на Еўразійскім прамысловым кангрэсе "Інтэграцыя-2019", паведамілі карэспандэнту БЕЛТА ў апараце міністра.
У адпаведнасці са стратэгіямі развіцця краін ЕАЭС прыярытэтамі супрацоўніцтва з Кітаем з'яўляюцца прамысловасць і аграпрамысловы комплекс. Зыходзячы з таго, блок па прамысловасці і АПК ЕЭК пры падтрымцы бакоў абазначыў тры найбольш значныя напрамкі ўзаемадзеяння. Так, стварэнне агульных лічбавых платформ і рашэнняў дасць магчымасць устараніць бар'еры для руху тавараў, паслуг, капіталу і даных. Ключавыя кампетэнцыі, на аснове якіх будзе фарміравацца гэта індустрыя будучага - электратранспарт, вялікія даныя, адытыўная вытворчасць, беспілотныя тэхналогіі. Кітай мае сур'ёзныя напрацоўкі ў гэтых напрамках, аднак для развіцця паспяховага супрацоўніцтва з ім краінам ЕАЭС неабходна кааперацыя і захаванне лічбавых стандартаў, ствараемых Кітаем у інавацыйных сектарах.
Яшчэ адным важным напрамкам з'яўляецца супрацоўніцтва ў навукова-тэхнічнай сферы, у тым ліку шляхам стварэння тэхнапаркаў, кластараў і тэхналагічных платформ. Узаемавыгаднай сферай супрацоўніцтва з'яўляецца таксама лакалізацыя тэхналогій. Краінам ЕАЭС цікавы перадавыя кітайскія распрацоўкі ў галіне рухавікабудавання, сучасных накапляльнікаў, аўтамабілебудавання і ў тым ліку вытворчасці электрамабіляў, дзе Кітай з'яўляецца адным з сусветных лідараў. У якасці прыкладу Аляксандр Субоцін назваў індустрыяльны парк "Вялікі камень" пад Мінскам, дзе ўжо запушчана сумеснае прадпрыемства "МАЗ-Вейчай" па зборцы рухавікоў "Вейчай" для грузавікоў і аўтобусаў. Там жа, у "Вялікім камені", сумесна з холдынгам "Вейчай" будуецца завод па вытворчасці грузавых каробак перадач маркі "Фаст Гір".
Акрамя таго, ЕАЭС зацікаўлены ва ўмацаванні навукова-тэхнічнага супрацоўніцтва ў сельскагаспадарчым сектары, у галіне ўкаранення перадавых аграрных тэхналогій і інавацый: маюць інтарэс кітайскія распрацоўкі ў частцы энергаэфектыўнасці і прадукцыйнасці перапрацоўчых вытворчасцей.
"Для таго каб усе гэтыя напрамкі рэалізаваліся, камісія сумесна з бакамі працуе над стварэннем карты індустрыялізацыі, - адзначыў Аляксандр Субоцін. - Яна будзе разгледжана на чарговым пасяджэнні Савета ЕЭК у лістападзе. Гэты дакумент павінен стаць праграмным інструментам у развіцці прамысловага сектара ЕАЭС, дзе будуць звязаны механізмы дзеянняў нацыянальных урадаў, фінансавых і банкаўскіх структур. Карта індустрыялізацыі абазначыць тыя сферы, у якія прыцягненне замежных інвестыцый і тэхналогій будзе найбольш мэтазгодна як з пункту гледжання развіцця эканомік нашых краін, так і з пункту гледжання саюзнай інтэграцыі. Гэта стане асновай для больш узважанага дыялогу з КНР".-0-
