3 красавіка, Масква /Эдуард Півавар – БЕЛТА/. Рассельгаснагляд зняў частковыя абмежаванні на пастаўкі ў Расію беларускага малака, гаворыцца ў інфармацыі, размешчанай на сайце Еўразійскай эканамічнай камісіі, паведамляе БЕЛТА.
"Федэральная служба па ветэрынарным і фітасанітарным наглядзе 26 сакавіка праінфармавала аб адмене абмежавання на пастаўкі ў Расійскую Федэрацыю пітнога малака, вырабленага прадпрыемствамі Рэспублікі Беларусь, - адзначылі ў ЕЭК. - Абмежаванне ўводзілася з 16 ліпеня 2018 года ў сувязі з выяўленнем у малацэ астаткавых нітратаў".
У ЕЭК нагадалі, што, заключаючы Дагавор аб Еўразійскім эканамічным саюзе, дзяржавы-члены ўзялі на сябе абавязацельствы забяспечваць абарачэнне на сваёй тэрыторыі прадукцыі, адпаведнай патрабаванням тэхнічных рэгламентаў саюза, без прад'яўлення да яе дадатковых патрабаванняў. 12 лістапада 2018 года Калегія ЕЭК разгледзела пытанне аб выкананні гэтага палажэння дагавора расійскім бокам. Паколькі тэхнічныя рэгламенты саюза, якія распаўсюджваюць сваё дзеянне на пітное малако, не змяшчаюць патрабаванняў аб нарміраванні ў ім нітратаў, Калегія ЕЭК накіравала паведамленне аб неабходнасці выканання норм дагавора.
"Устараненне бар'ераў на ўнутраным рынку саюза, звязаных з прад'яўленнем да прадукцыі дадатковых патрабаванняў, з'яўляецца работай, якая патрабуе зладжаных дзеянняў камісіі і ўпаўнаважаных дзяржаўных органаў краін ЕАЭС для фарміравання аднастайнага рэгулявання, што забяспечвае функцыянаванне адзінага рынку тавараў, паслуг, капіталу і працоўных рэсурсаў", - адзначыла член Калегіі (міністр) па ўнутраных рынках, інфарматызацыі, інфармацыйна-камунікацыйных тэхналогіях ЕЭК Карынэ Мінасян.-0-
