15 лютага, Мінск /Кар. БЕЛТА/. Зняцце забароны на прымяненне спрошчанай сістэмы падаткаабкладання (ССП) для інтэрнэт-магазінаў палепшыла ўмовы вядзення прадпрымальніцкай дзейнасці. Такое меркаванне выказала намеснік начальніка галоўнага ўпраўлення метадалогіі падаткаабкладання - начальнік аддзела спецыяльных рэжымаў падаткаабкладання Міністэрства па падатках і зборах Беларусі Ірына Луферчык у час анлайн-канферэнцыі на сайце БЕЛТА.
У адпаведнасці з дэкрэтам нумар 7 "Аб развіцці прадпрымальніцтва" з 1 студзеня 2018 года суб'екты прадпрымальніцтва, якія ажыццяўляюць рознічны гандаль праз інтэрнэт-магазіны, маюць права прымяняць спрошчаную сістэму падаткаабкладання. "Права выбару прымянення ССП альбо агульнага парадку падаткаабкладання, якое з'явілася ў інтэрнэт-магазінаў, несумненна, палепшыла падатковыя ўмовы вядзення прадпрымальніцкай дзейнасці", - лічыць Ірына Луферчык.
Паводле даных МАРГ, 50 працэнтаў інтэрнэт-магазінаў у Беларусі належаць індывідуальным прадпрымальнікам. Менавіта ў гэтай катэгорыі суб'ектаў спрошчаная сістэма падаткаабкладання карыстаецца найбольшым попытам.
Забарона на прымяненне ССП інтэрнэт-магазінамі была ўстаноўлена з 1 студзеня 2016 года.-0-