9 мая, Мінск /Кар. БЕЛТА/. China CITIC Bank зацікавіўся купляй беларускага банка. Аб гэтым ішла размова 8 мая на сустрэчы прэм'ер-міністра Беларусі Андрэя Кабякова з дэлегацыяй кітайскай карпарацыі CITIC Group на чале з яе прэзідэнтам Ван Цзюнам, перадае карэспандэнт БЕЛТА.
Паводле інфармацыі кіраўніка ўрада, з кіраўніцтвам CITIC Bank ужо абмяркоўвалася пытанне ўваходжання ў акцыянерны капітал беларускіх банкаў. Кітайскі бок выказаў зацікаўленасць у куплі беларускага банка.
"Мы маглі б вам прапанаваць два дзяржаўныя банкі, якія можна разгледзець. У выпадку вашай зацікаўленасці мы гатовы абмяркоўваць умовы", - адзначыў Андрэй Кабякоў.
Беларусі цікавы вопыт CITIC Group у фінансавай і інвестыцыйнай сферах. Да таго ж Беларусь і Кітай ствараюць сумесны інвестыцыйны фонд. "Мы лічым, што гэта толькі пачатак вялікай работы. Беларусь зацікаўлена ў супрацоўніцтве і ў іншых сегментах фінансавага рынку", - дадаў Андрэй Кабякоў.-0-
