17 кастрычніка, Мінск /Кар. БЕЛТА/. Канцэрн "Белнафтахім" разлічвае да канца бягучага года падпісаць з РФ баланс паставак нафты на 2020 год, паведаміў сёння журналістам намеснік старшыні "Белнафтахіма" Уладзімір Сізаў на форуме "Нафтахімія", перадае карэспандэнт БЕЛТА.
"Ён павінен быць падпісаны, і нам вельмі хацелася б, каб гэта было да канца года зроблена", - адзначыў Уладзімір Сізаў.
Паводле яго слоў, працэс перагавораў яшчэ ідзе. "Баланс паставак нафты на 2020 год - гэта пытанне двухбаковых узаемаадносін. Таму нам хацелася б, каб мы максімальна аператыўна выпрацавалі сумеснае рашэнне. Пакуль ідзе працэс перагавораў", - дадаў намеснік старшыні "Белнафтахіма".
Адказваючы на пытанне, ці прапануе беларускі бок вызначыць на наступны год фактычны аб'ём перапрацоўкі расійскай нафты на сваіх НПЗ у памеры больш як 18 млн т, Уладзімір Сізаў сказаў: "Усё будзе залежаць ад тых умоў пастаўкі, якія будуць вызначаны на 2020 год".-0-