15 кастрычніка, Мінск /Кар. БЕЛТА/. Беларускі вопыт дзяржаўна-прыватнага партнёрства для развіцця энергетычнага сектара прадстаўлены на нарадзе Арганізацыі па бяспецы і супрацоўніцтве ў Еўропе па разглядзе выканання абавязацельстваў у галіне эканоміка-экалагічнага вымярэння, якая праходзіць у Вене 15-16 кастрычніка, паведамілі БЕЛТА ў прэс-службе Міністэрства энергетыкі.
Намеснік міністра энергетыкі Вадзім Закрэўскі выступіў у якасці асноўнага дакладчыка сесіі, прысвечанай тэме дзяржаўна-прыватнага партнёрства ў інтарэсах належнага кіравання і інавацый у энергетычным сектары. Мадэратарам сесіі стала пасол Беларусі ў Аўстрыі, пастаянны прадстаўнік Беларусі пры АБСЕ Алена Купчына.
Вадзім Закрэўскі прадставіў перадавыя практыкі Беларусі па імплементацыі механізма дзяржаўна-прыватнага партнёрства, у тым ліку ў частцы стварэння прававой асновы, фарміравання інстытуцыянальнага асяроддзя для развіцця ўзаемадзеяння дзяржаўных і прыватных арганізацый, рэалізацыі пілотных энергетычных праектаў. Намеснік міністра акцэнтаваў увагу, што ў працэсе імплементацыі механізма ДПП на першае месца трэба ставіць інтарэсы людзей, арыентуючыся ў тым ліку на мэты Парадку дня ў галіне ўстойлівага развіцця на перыяд да 2030 года.
Мэта нарады АБСЕ - разгляд выканання абавязацельстваў краін - удзельніц арганізацыі ў частцы выканання Мэт устойлівага развіцця па забеспячэнні ўсеагульнага доступу да недарагіх, надзейных, устойлівых і сучасных крыніц энергіі. Акцэнт зроблены на асаблівасці развіцця энергетычнага сектара ў эпоху лічбавізацыі, эфектыўную ахову энергасетак ад уздзеяння магчымых катастроф, развіццё дзяржаўна-прыватнага партнёрства, выкарыстанне аднаўляльных крыніц энергіі і павышэнне энергаэфектыўнасці існуючых энергасістэм.-0-
