19 кастрычніка, Верона /Кар. БЕЛТА/. Увядзенне атамнай электрастанцыі ў Беларусі ў строй акажа істотны ўплыў на энергетыку ў рэгіёне. Такое меркаванне выказаў сёння дзяржаўны сакратар Саюзнай дзяржавы Рыгор Рапота ў час дыскусіі на палях Х Еўразійскага эканамічнага форуму ў Вероне, перадае карэспандэнт БЕЛТА.
"БелАЭС карэнным чынам памяняе энергетычную карціну ў дадзеным рэгіёне Еўропы", - падкрэсліў дзяржсакратар. Паводле яго слоў, будаўніцтва атамнай электрастанцыі ў Беларусі - гэта вельмі важны і буйны сумесны беларуска-расійскі праект, які можа служыць добрым прыкладам міжнароднага ўзаемадзеяння ў энергетычнай сферы.
"Буйныя энергетычныя і іншыя праекты, думаю, былі б вельмі запатрабаваны і для развіцця супрацоўніцтва паміж Еўрасаюзам і Еўразійскім эканамічным саюзам. Размова ідзе менавіта аб праектах для міжблокавай кааперацыі, а не аб тых, якія можа рэалізаваць ЕС з асобнымі краінамі ЕАЭС на двухбаковай аснове, - падкрэсліў Рыгор Рапота. - Краіны ЕАЭС геаграфічна з'яўляюцца мостам паміж Усходам і Захадам. Але пакуль гэты гандлёвы і эканамічны мост па розных прычынах эфектыўна не запрацаваў".
Яшчэ адна магчымасць для супрацоўніцтва Еўрасаюза і ЕАЭС - гэта, паводле слоў Рыгора Рапоты, новы эканамічны пояс Шаўковага шляху, які быў ініцыіраваны Кітаем. "Краіны ЕАЭС маюць вялікі патэнцыял, і яго тут трэба задзейнічаць. Але такія праекты важна рэалізоўваць з удзелам расійскага боку, Расія не павінна выпадаць", - дадаў ён.-0-