21 сакавіка, Тбілісі /Уладзімір Мацвееў - БЕЛТА/. Беларусь займае ўсё больш ніш у грузінскім імпарце. Аб гэтым у інтэрв'ю карэспандэнту БЕЛТА расказаў пасол Беларусі ў Грузіі Міхаіл Мятлікаў.
Паводле яго слоў, толькі за апошнія год-паўтара таварная наменклатура пастаўляемай у Грузію беларускай прадукцыі значна пашырылася. "Калі раней мы пастаўлялі прадукцыю па 200 пазіцыях, то сёння на ўзроўні чатырох зканаў таварнай наменклатуры іх ужо больш за 300", - адзначыў дыпламат.
У пастаўляемых у Грузію беларускіх таварах прадстаўлены амаль усе сектары эканомікі. У прыватнасці, сельскагаспадарчая прадукцыя - ад насеннай бульбы да прадуктаў харчавання, сельгасмашынабудаванне, грузавыя аўтамабілі, лекавыя сродкі, мэбля, нафтахімічная прадукцыя - шыны, сінтэтычныя ніці, кабелі.
Што датычыцца прадуктаў харчавання, то на сённяшні дзень у Грузіі ўжо працуюць каля дзесяці магазінаў (дзве гандлёвыя сеткі), дзе прадаюцца толькі прадукты з Беларусі, пачынаючы ад хлеба і заканчваючы лікёра-гарэлачнымі вырабамі. Прадукцыя многіх беларускіх вытворцаў прысутнічае і ў іншых сетках на рынку рознічнага гандлю Грузіі - Goodwill, Carrefour. Гэта не толькі прадукты харчавання, але і, напрыклад, панчошна-шкарпэтачныя вырабы, касметыка.
"Мы ў пасольстве пастаянна аналізуем грузінскі імпарт з іншых краін. Грузія, дарэчы, устанавіла рэжымы свабоднага гандлю з краінамі СНД, з ЕС, Турцыяй, а з 1 студзеня гэтага года ўступіла ў сілу пагадненне аб свабодным гандлі Грузіі з Кітаем. Вядома, гэта стварае ў тым ліку і нам сур'ёзную канкурэнцыю, - канстатаваў Міхаіл Мятлікаў. - Але разам з тым, напрыклад, па малаку і вяршках (код ГНЗЭД 0402) доля беларускай прадукцыі ў агульным імпарце Грузіі складае 15 працэнтаў, па сметанковым масле - 12 працэнтаў, сырах - каля 9 працэнтаў, каўбасных вырабах і мясной прадукцыі - 20 працэнтаў. Гэта станоўчыя прыклады, і хачу сказаць, што наша доля ў імпарце вельмі сур'ёзная".-0-
