31 кастрычніка, Мінск /Кар. БЕЛТА/. Беларусь зацікаўлена і гатова прадоўжыць нарошчванне аб'ёмаў і пашырэнне асартыменту паставак сельскагаспадарчай прадукцыі і прадуктаў харчавання на турэцкі рынак па канкурэнтаздольных цэнах, забяспечыўшы высокую якасць і бяспеку. Аб гэтым заявіў міністр сельскай гаспадаркі і харчавання Анатоль Хацько ў час сустрэчы з міністрам сельскай і лясной гаспадаркі Турцыі Бекырам Пакдэмірлі, паведамілі БЕЛТА ў прэс-службе Мінсельгасхарча.
"Пытанне аб пашырэнні спіса беларускіх сельгаставараў і прадуктаў харчавання для паставак на турэцкі рынак абмяркоўвалася на першым пасяджэнні сумеснай беларуска-турэцкай рабочай групы па гандлі, якое адбылося ў Анкары 23 верасня гэтага года, - нагадалі ў міністэрстве. - Мінсельгасхарч сумесна з зацікаўленымі прапрацаваў магчымасць пашырэння асартыменту пастаўляемых тавараў і вызначыў пералік перспектыўнай для экспарту ў Турцыю сельскагаспадарчай прадукцыі і прадуктаў харчавання".
У прыватнасці, размова ідзе аб сухім абястлушчаным і неразведзеным малаку, масле, сырах і тварагу, малочнай сыроватцы, натуральнамалочнай прадукцыі, марожаным. З мясной прадукцыі Беларусь гатова пастаўляць Турцыі мяса ялавічыны і птушкі, каўбасныя вырабы, мясныя кансервы. Таксама ў пералік увайшлі курыныя яйкі, агародніна (таматы), бульба, этылавы спірт, мука пшанічная або пшанічна-аржаная, макаронныя вырабы, рапсавы алей, казеін, ільновалакно.
Бакі абмеркавалі паскарэнне рашэнняў па доступе беларускага мяса ялавічыны на рынак Турцыі. Як адзначылі ў Мінсельгасхарчы, Беларусь гатова забяспечыць пастаўку ялавічыны з атэставаных турэцкай ветэрынарнай службай мясаперапрацоўчых прадпрыемстваў і гарантаваць яе высокую якасць і бяспеку. Таксама абмяркоўвалася развіццё супрацоўніцтва ў сферах насенняводства, біятэхналогій, цяплічных гаспадарак і навукі.-0-
