11 сакавіка, Мінск /Юлія Огнева - БЕЛТА/. Большасць індывідуальных прадпрымальнікаў, якія ў студзені не працавалі, у сакавіку выйшлі на работу, паведаміў сёння журналістам дырэктар дэпартамента па прадпрымальніцтве Міністэрства эканомікі Беларусі Пётр Арушаньянц, перадае карэспандэнт БЕЛТА.
"Інфармацыя супярэчлівая, назваць лічбы складана. Скажу, што большасць з тых, хто ў студзені не працаваў, у сакавіку працуе ўжо. Падазраю, што нават усе працуюць", - адзначыў Пётр Арушаньянц.
Паводле яго слоў, на 1 студзеня 2015 года на рынках і ў гандлёвых цэнтрах выкарыстоўваліся 74 працэнты гандлёвых месц, на 1 студзеня 2016-га - 65 працэнтаў, гэта значыць размова ідзе аб іх няпоўнай запаўняльнасці нават без уліку ІП, якія не выйшлі на работу.
Пётр Арушаньянц расказаў, што за 2015 год у Беларусі колькасць ІП зменшылася прыкладна на 6 тыс. і на пачатак 2016-га складала каля 243 тыс. У ГЦ і на рынках ажыццяўляюць гандаль толькі 110 тыс. індывідуальных прадпрымальнікаў, з якіх каля палавіны - прадаўцы тавараў лёгкай прамысловасці.-0-
