28 верасня, Мінск /Кар. БЕЛТА/. Заяўкі на адкрыты конкурс кінапраектаў можна падаць да 4 кастрычніка, паведамілі карэспандэнту БЕЛТА ў Міністэрстве культуры Беларусі.
Адбор заявак на конкурс кінапраектаў праводзіцца ў адпаведнасці з заканадаўствам аб дзяржзакупках. Згодна з умовамі ўдзелу ў конкурсе, інфармацыя аб якім размешчана на афіцыйным сайце ведамства, плануецца запуск двух ігравых фільмаў (у фармаце чатырох тэлевізійных серый і 100-мінутнай кінаверсіі), 5 неігравых і 8 анімацыйных. Фінансаванне закупкі будзе праводзіцца з рэспубліканскага бюджэту ў IV квартале бягучага года.
Вытворцам фільма (прадзюсарам) або адным з вытворцаў фільма (прадзюсараў) павінна выступаць юрыдычная асоба Рэспублікі Беларусь, атрымальнікам сродкаў пры гэтым - рэзідэнт краіны. Работы і паслугі па вытворчасці фільма павінны ажыццяўляць рэзідэнты Беларусі на яе тэрыторыі (за выключэннем выканання работ і аказання паслуг, якія ў Беларусі не выконваюцца або не аказваюцца, а таксама выпадкаў, калі вытворчасць фільма ажыццяўляецца сумесна з замежнымі вытворцамі (прадзюсарамі). Неабходным патрабаваннем таксама з'яўляецца наяўнасць уласнага кваліфікаванага персаналу і вопыту работы ў галіне кінематаграфіі не менш за 5 гадоў. Склад здымачнай групы фарміруецца не менш як на 70 працэнтаў з грамадзян Беларусі, за выключэннем выпадкаў, калі вытворчасць фільма ажыццяўляецца сумесна з замежнымі вытворцамі (прадзюсарамі). Акрамя таго, прэтэндэнты на ўдзел у адкрытым конкурсе кінапраектаў павінны мець у наяўнасці ўласныя фінансавыя і (або) прыцягнутыя кадравыя і матэрыяльна-тэхнічныя магчымасці, неабходныя для выканання дагавора на працягу ўсяго перыяду яго дзеяння.
Конкурсная прапанова прэтэндэнтаў на дзяржпадтрымку павінна ўключаць літаратурны сцэнарый фільма; сінопсіс другой і наступных серый фільма; копію аўтарскага дагавора з аўтарам сцэнарыя фільма; копіі дагавораў з аўтарамі фільма на стварэнне фільма; папярэдні разлік кошту фільма, у тым ліку з пазначэннем артыкулаў затрат і памеру чаканага прыбытку; план камерцыйнай рэалізацыі фільма на працягу трох гадоў з моманту яго стварэння; дакументальнае пацвярджэнне намеру сувытворцаў удзельнічаць у вытворчасці фільма або магчымасць удзельніка конкурсу забяспечыць фінансаванне за кошт уласных сродкаў і іншых крыніц і г.д.
Конкурсныя прапановы прэтэндэнты могуць накіраваць на папяровым носьбіце ў Міністэрства культуры (у 5 экзэмплярах) з паметкай "на конкурс", а таксама падаць у электронным выглядзе, размясціўшы іх на афіцыйным сайце. Больш падрабязную інфармацыю аб умовах удзелу можна знайсці на сайце Мінкультуры.
Тэрмін адкрыцця прапаноў - 5 кастрычніка бягучага года, тэрмін іх разгляду - да 28 кастрычніка.-0-
