Сцяг Чацвер, 28 сакавіка 2024
Усе навіны
Усе навіны
Культура
08 мая 2018, 09:53

Вандроўны фестываль вулічных тэатраў адправіцца 19 мая ў тур па Беларусі

8 мая, Мінск /Кар. БЕЛТА/. Першы ў гісторыі Беларусі вандроўны фестываль вулічных тэатраў і цырка "Караван радасці" адправіцца 19 мая ў тур па краіне, паведаміў БЕЛТА арт-дырэктар праекта Уладзімір Галак.

Больш за 70 артыстаў на працягу лета прынясуць свята дзясяткам тысяч жыхароў вялікіх і малых населеных пунктаў Беларусі. Стартуе караван у Баранавічах у час святкавання Дня горада. Цыркачы і вулічныя акцёры бясплатна выступяць на трох пляцоўках у самым цэнтры горада. Гледачы змогуць убачыць цыркавыя шоу, дзіцячыя спектаклі, клаўнаду, незвычайныя перформансы і нават жывыя статуі. Закрые праграму незвычайны спектакль пра Дон Кіхота, дзе жадаючыя змогуць стаць удзельнікамі мучной бітвы.

Пасля Баранавіч "Караван радасці" будуць сустракаць у Наваполацку, Кобрыне, Жодзіне, Заслаўі і гарпасёлку Зэльва Гродзенскай вобласці.

"Мы хочам, каб вулічныя артысты зрабілі беларускія гарады яшчэ больш яркімі, прыгожымі, энергічнымі, - растлумачыў Уладзімір Галак. - Пры стварэнні праекта натхняліся творчасцю больш вопытных калег з Расіі і Заходняй Еўропы. Хочам такім чынам далучыць беларускіх гледачоў да сучаснага мастацтва. Таксама гэты праект быў бы немагчымы без ініцыятывы гарадскіх і раённых выканаўчых камітэтаў, якія пайшлі на такі эксперымент".

Арганізатары запрашаюць калектывы, якія працуюць у жанрах вулічнага тэатра або цырка, далучыцца да праекта. Дастаткова прыслаць заяўку ў свабоднай форме на электронную пошту stfest.minsk@gmail.com.

Партнёрам праекта выступае Нацыянальны цэнтр сучасных мастацтваў Рэспублікі Беларусь.-0-

Падпісвайцеся на нас у
Twitter
Топ-навіны
Свежыя навіны Беларусі