17 мая, Мінск /Кар. БЕЛТА/. Паказ беларускіх дакументальных фільмаў пройдзе 18 мая ў Маскве. Як паведамілі карэспандэнту БЕЛТА на Нацыянальнай кінастудыі "Беларусьфільм", у Маскоўскім Доме кіно адбудзецца творчы вечар вядомага беларускага кінарэжысёра Галіны Адамовіч і паказ трох яе карцін.
Будуць паказаны дакумэнтальныя фільмы "Завядзёнка", "Мужчынская справа", а таксама фільм, зроблены на відэастудыі Свята-Лісавецінскага жаночага манастыра ў Мінску, - "Манашка". Ва ўсіх гэтых стужак выдатны фестывальны лёс - яны адзначаны прызамі і ўзнагародамі вядучых расійскіх і еўрапейскіх кінафорумаў. Фільм "Завядзёнка" атрымаў узнагароды 11 кінафестываляў, у тым ліку Гран-пры МКФ "Залаты Віцязь" у Расіі, Гран-пры кінафестываляў у Італіі, Іране, Польшчы, Арменіі, Малдове, Беларусі. Галоўныя прызы на 12 міжнародных кінафестывалях атрымаў фільм "Манашка".
Вядучы кінарэжысёр студыі "Летапіс" Нацыянальнай кінастудыі "Беларусьфільм" Галіна Адамовіч - непаўторны майстар дакументальнага кіно са сваім творчым почыркам, стылістыкай, глыбокім пранікненнем у псіхалагічны свет герояў.
Разам з Галінай Адамовіч на сустрэчу ў Маскву адправіцца вядомы ў праваслаўных колах рэгент і кампазітар Юліянія (Дзянісава).
Творчы вечар і паказ беларускага дакументальнага кіно арганізаваў Саюз кінематаграфістаў Расійскай Федэрацыі.-0-
