23 лістапада, Мінск /Кар. БЕЛТА/. Падтрымка гледачоў і каманды дапаможа Даніэлю Ястрэмскаму ў дзень фіналу дзіцячага конкурсу песні "Еўрабачанне-2018" настроіцца на паспяховае выступленне, адзначыла карэспандэнту БЕЛТА вакальны прадзюсар Вольга Драздова.
"Дзень фіналу, як звычайна, пачнецца ў Даніэля з дыхальнай гімнастыкі і распеўкі. Але самае галоўнае - уся каманда будзе падтрымліваць яго баявы дух. Апошнія месяцы мы ўсе працавалі поплеч, адточваючы фінальны нумар. Мы таксама, як і Даніэль, перажываем і жадаем яму дастойна прадставіць краіну на песенным форуме", - сказала Вольга Драздова.
Падтрымка глядзельнай залы заўсёды адчуваецца на сцэне. "Яна вельмі важна. Я ўпэўнена, што гэта дапаможа Даніэлю выступіць выдатна", - падкрэсліла вакальны прадзюсар.
У час фінальнага шоу 25 лістапада на сцэну "Мінск-Арэны" выйдуць юныя таленты з Украіны, Партугаліі, Казахстана, Албаніі, Расіі, Нідэрландаў, Азербайджана, Беларусі, Ірландыі, Сербіі, Італіі, Аўстраліі, Грузіі, Ізраіля, Францыі, Македоніі, Арменіі, Уэльса, Мальты і Польшчы. Афіцыйны прадстаўнік Беларусі на дзіцячым конкурсе песні Даніэль Ястрэмскі выступіць пад восьмым нумарам. Ён выканае кампазіцыю "Time".
Прамую трансляцыю песеннага форуму будуць весці тэлеканалы "Беларусь 1" і "Беларусь 24", а таксама сайт Белтэлерадыёкампаніі (www.tvr.by) і афіцыйны сайт дзіцячага "Еўрабачання" (www.junioreurovision.tv).
Арганізатарам усіх мерапрыемстваў дзіцячага "Еўрабачання-2018" выступае Белтэлерадыёкампанія як адзіны ў краіне член Еўрапейскага вяшчальнага саюза.-0-
