Поўная версія

Фотапраект "Я бачу сэрцам" пакажа непаўторнае хараство Беларусі

Культура 20.04.2018 | 17:59

20 красавіка, Мінск /Кар. БЕЛТА/. Фотапраект "Я бачу сэрцам", які запускае ў Год малой радзімы міжнародны спадарожнікавы тэлеканал "Беларусь 24", прадастаўляе магчымасць гледачам паглядзець на сваю краіну вачыма фатографаў, паведамілі БЕЛТА ў прэс-службе Белтэлерадыёкампаніі.

Праект прызначаны аб'яднаць майстроў фатаграфіі і фотамастакоў з уласным бачаннем непаўторнага хараства Беларусі, яе багатай прыроднай і культурнай спадчыны, важных падзей, свят і людзей.

Лепшыя работы канал публікуе на сваім афіцыйным сайце belarus24.by ў раздзеле "Пра Беларусь", а самымі яркімі кадрамі дзеліцца ў сацыяльных сетках. З інтэрнэту праект выйшаў у рэальны свет: фатаграфіі можна глядзець у галерэях Мінска. На працягу года пройдуць некалькі выстаў, а завершыць праект "Я бачу сэрцам" фінальная экспазіцыя ў Нацыянальнай бібліятэцы Беларусі лепшых здымкаў аб нашай краіне.

Першая галерэя работ Ігара Бышнева пад назвай "Беларусь - некранутая прырода ў цэнтры Еўропы", якая адкрылася ў сакавіку ў Дзень дзікай прыроды, прадставіла ўнікальныя здымкі зуброў, рысей і драпежных птушак, якіх фатограф здымае з асаблівым хваляваннем і любоўю. У галерэі "Людзі Беларусі" рэпартажны фатограф Ілья Гелей падзяліўся ўласным бачаннем беларусаў розных прафесій і ўзростаў - людзей, якія напоўнены шчырымі эмоцыямі і пачуццямі.

Тэлеканал таксама вітае эксперыменты. У рамках фотапраекта Станіслаў Багдзевіч прадставіў 3D-галерэю, якая дае ўнікальную магчымасць "прагуляцца" па запаведніках Беларусі. Гэтыя работы даступны як на сайце, так і ў Instagram-акаўнце канала @belarus24.

Міжнародны спадарожнікавы тэлеканал "Беларусь 24" прапануе фатографам далучыцца да праекта "Я бачу сэрцам" і падзяліцца сваёй творчасцю з усёй краінай і светам. Падрабязную інфармацыю можна даведацца па тэлефоне 8-017-389-61-46 або з дапамогай электроннай пошты belarus24.tv@yandex.ru.-0-

Навіны рубрыкі Культура
Поўная версія